Suliffinnut piginnaanngorsarneq

Nalinginnaasumik paasissutissiineq 

Nunatsinni kikkulluunniit sulilernissamik periarfissaqassapput. Suliffeqaruit imminullu pilersorsinnaallutit, ilaquttatit pilersorsinnaassavatit. Inuusuttut ilaasa suliffik paarisinnaajumallugu pisariaqartittarpaat pisinnaasat tigussaanerusut sungiusaqqaassallugit, tamakkulu sungiusarneqarsinnaapput sulinermut aamma suliffimmi sungiusarnikkut.

Sulinermut aamma suliffimmi sungiusarnermi ilaatigut illit ukuninnga ilikkagaqarsinnaavutit:
  • Sannavimmiinneq
  • Suliffimmik paarsineq
  • Ullaakkut makissinnaaneq
  • Imminut akisussaaffigisinnaaneq

Ilutigalugu suliaqarfigisamik kingusinnerusukkut assersuutigalugu inuussutissarsiutinik ilinniartitaaneq aqqutigalugu ilinniagaqalersinnaanissat pillugu misilittaasinnaavutit.

Malugiuk
Piareersarfiit amerlanngillat sulinermut sungiusarnissamik neqerooruteqarsinnaasut.

Akuerineqarnissamut piumasaqaatit 

Sulinermut aamma suliffimmi sungiusarniaruit 15-it 25-illu akornanni ukioqassaatit.

Sivisussusaa 

Sulinermut aamma suliffimmi sungiusarneq nalinginnaasumik qaammatit pingasuniit qaammatit arfinillit tikillugit sivisussuseqartarpoq suliffimmillu misiliinermi pisarluni.

Sungiusarluni suliffigisanni sulisitsisup sulinermi aamma suliffimmi sungiusarninni akisussaaffigissavaatit. Sulisitsisuilli Piareersarfimmi siunnersuisorisartakkat attaveqarfigissavaa marluullutillu sulinermi aamma suliffimmi sungiusarnissannut piareersassallutit.

Sulinermi aamma suliffimmi sungiusarnerit qaammatinik pingasunik sivitsorsinnaavat illit siunnersuisorisartakkallu isumaqarussi tamanna pisariaqartikkit.

Ilinniagaqarnersiutit 

Sulinermut aamma suliffimmi sungiusarlutit ilinniagaqarnersiuteqarsinnaavutit. 18-ileereersimaguit qaammammut 4.300 koruunit ilinniagaqarnersiutitut pisartagarissavatit, sulilu 18-iliisimanngikkuit qaammammut 2.150 koruunit ilinniagaqarnersiutitut pisartagarissallugit. Pissuteqarnak takkussimanngikkuit sungiusarlutit suliffigisavit najukkanni Piareersarfimmi siunnersuisartunnut ilisimatitsissutigineqassaaq. Tamatuma kingorna akunnerit peqanngiffigisimasatit ilinniagaqarnersiutinnit ilanngaatigineqassapput.

Sapaatip-akunneranut akunnerit 40-t sinnerlugit sulisimaguit sungiusarlutit suliffigisavit akunnerit qaangiuttoorutigisatit akilissavai.

Qinnuteqarneq 

Sulinermut aamma suliffimmi sungiusarnermik ingerlataqarusukkuit najukkanni Piareersarfik saaffigissavat. Tassani siunnersuisartup iliuusissanut pilersaarut suliarissavaa, ilaatigut nassuiaatigineqassammat sulinermut aamma suliffimmi sungiusarnissami suut aamma sooq suliaqarfigissaneritit.

Najukkanni Piareersarfik takuuk

Tamatuma kingorna qinnuteqarnissamut immersuiffissaq tunniunneqassaaq, taannalu immersoriarlugu najukkanni Piareersarfimmut tunniutissavat. Iliuusissanut pilersaarusiaq tunngavigalugu sungiusarluni suliffissaq naleqquttoq ujartussavarsi, tassani sulinermut aamma suliffimmi sungiusarneq ingerlanneqassammat.

Aamma nammineerlutit sungiusarluni suliffissaq ujartorsinnaavat, taannalu siunnersuisartumit akuerineqassaaq.

Taamatuttaaq sulinermut aamma suliffimmi sungiusarnissamik ukioq kaajallallugu ingerlatsinissamik qinnuteqarsinnaavutit.

Sulinermi sungiusarfimmi maleruagassat 

Sulinermut aamma suliffimmi sungiusarlutit piffissaq suliffiusoq nalinginnaasumik tassaasarpoq ullormut akunnerit arfineq-pingasut, ataasinngornermiit tallimanngornermut. Sungiusarlutit suliffigisat piffissani allani suliffiusarpat piffissaq suliffiusussaq sulisitsisorisannut isumaqatigiissutigissavat.

Piffissat isumaqatigiissutaasut saniatigut sungiusarlutit suliffigisanni maleruagassat tamanut atuuttut aamma malissavatit.

Sungiusarlutit suliffigisanni immikkut sulliseqarnissat piumasaqaataappat, taakku sungiusarlutit suliffigisannit pissarsiarissavatit.

Nakorsiassaguit imaluunniit Piareersarfimmi siunnersuisartorisat oqaloqatigiartussagukku, sulinngissinnaavutit. Sungiusarlutit suliffigisanni attaveqarfigisartakkat sulinnginnissat pillugu isumaqatigiissuteqarfigissavat.

Napparsimanerit pissutigalugu suliartorsinnaanngikkuit, sungiusarlutit suliffigisanni attaveqarfigisartakkat nalunaarfigissavat.

Ajornartorsiutit naammagittaalliuuteqartarnerlu 

Sulinermut aamma suliffimmi sungiusartillutit ajornartorsiuteqartoqalerpat aaqqiagiinngissuteqartoqalerpalluunniit, najukkanni Piareersarfimmi siunnersuisartorisat attavigissavat. Tamatumani assersuutigalugu makku pineqarsinnaapput:
  • Sungiusarlutit suliffigisanni iluamik pineqanngitsutut misigisutit
  • Qaangiuttoortarnitit akilerneqanngitsoortarnerat
  • Paasigit suliffigisat ilinnut naleqqutinngitsoq

Illit siunnersuisartorisallu peqatigiillusi ajornartorsiut naliliiffigisinnaavarsi qanoq annertutiginersoq aammalu qanoq iliuuseqartoqartariaqarnersoq. Tamatumani assersuutigalugu makku pineqarsinnaapput:
  • Siunnersuisartorisat sulisitsisorisannut attaveqartariaqassasoq
  • Sungiusarlutit suliffissannik allamik ujartuissasusi

Naammagittaalliuuteqartarneq
Sulinermut aamma suliffimmi sungiusarnissamut akuerineqanngikkuit, naammagittaalliuuteqarsinnaavutit. Naammagittaalliuuteqassaguillu najukkanni innuttaasunut sullissivik imaluunniit nunaqarfiup allaffia saaffigissavatit.

Allaaserisat attuumassutillit

Majoriaq – Majoriat siunnersuisarfiupput atuarfiillu, illoqarfinni annerni tamani nunaqarfimmilu ataatsimi inissisimasut.
Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik
Imaneq 1A 301
Postboks 1601
3900 Nuuk

Oqarasuaat: (+299) 34 50 00
Fax: (+299) 34 63 64
E-mail: isiin@nanoq.gl
Inuussutissarsiorneq pillugu nittartagaq: businessingreenland.gl
Nittartagaq: www.naalakkersuisut.gl