Ilusilersorneqarnera atuartitaanerlu

Nalinginnaasumik paasissutissiineq 

Kalaallit Nunaanni pinngitsoorani ukiuni qulini atuartussaatitaaneq atuuppoq. Tassa imaappoq angajoqqaat meeqqatik arfinillit 16-illu akornanni ukiullit sivikinnerpaamik ukiuni qulini atuartitaanissaat isumagissallugu pisussaaffeqarput.

Angajoqqaat amerlanerpaarpaat meeqqami meeqqat atuarfianni atuarnissaannut nalunaartarput.

Atuartussaatitaaneq 

Kalaallit Nunaanni pinngitsoorani atuartussaatitaaneq atuuppoq. Tassa imaappoq angajoqqaat meeqqatik meeqqat atuarfiannut nalinginnaasumut atuariartortinnissaannut pisussaanngillat. Akerlianik angajoqqaat meeqqatik sivikinnerpaamik ukiuni qulini atuartitaanissaat isumagissallugu pisussaapput.

Angerlarsimaffimmi atuartitsineq
Angajoqqaat ataasiakkaat meeqqatik meeqqat atuarfiannut atuariartortinnissaannik kissaateqarneq ajorput – imaluunniit periarfissaqarneq ajorput. Tassaasinnaapput angajoqqaat savaatilittut inuussutissarsiutillit taamaalillutillu meeqqat atuarfiat qimangaatsiarlugu najugaqarlutik. Taamaattoqartillugu angerlarsimaffimmi atuartitsisarsinnaasumik atorfinitsitsisoqarsinnaavoq.

Angerlarsimaffimmi atuartitsineq meeqqat atuarfiannut ungasissumi najugallit meeqqanulluunniit namminneq angerlarsimaffimminni atuartitserusuttunit qitornarineqartut pineqaraluarpata, najukkami Kommunalbestyrelsimit akuersissutigineqartussaavoq. Kommunalbestyrelsittaaq angerlarsimaffimmi atuartitsineq ataavartumik nakkutigisassaraa.

Ilusilersorneqarnera 

Meeqqat atuarfianni ukiut qulit atuartitsiviusut alloriarfinnut pingasunut agguagaapput:
  • Nukarlernut 1. - 3. klasse
  • Akullernut 4. - 7. klasse
  • Angajullernut 8. - 10. klasse

Atuartitsineq 

Atuartut ataatsimoortunngorlugit atuaqatigiinngorlugilluunniit agguaanneqartarput. Atuartitaanermi atuartitsissutit agguagaasinnaapput assigiinngitsuusinnaallutilluunniit.

Atuartitsissutit agguagaasut tassaasinnaapput, atuartitsissutit ataasiakkaarlugit atuartitsisoqartarluni, soorlu kalaallisut, matematikki, timersorneq imaluunniit inuttut ineriartorneq.

Atuartitsissutit assigiinngitsut ima paasineqassapput, atuartitsissutit arlallit ataatsimoorullugit, soorlu immikkut sammisaqarnermi.

Meeqqat atuarfianni atuartitsineq aaqqissugaavoq atuartut ilikkagassaasa suuneranik najoqqutassaqarluni, qaqugu aamma qanoq, qulakkeerneqarlunilu ilikkagassat ataasiakkaat pisariaqartitaat soqutigisaallu aallaavigalugit.

Misilitsinneq naliliinerlu 

Nukarlernut akullernullu alloriarfiit naanerini atuartut misilitsinnernik aqqusaagaqassapput, alloriarfimmut tullermut ingerlaqqinnginnerminni. Alloriarfinni misilitsinnerit siunertaraat atuartut ilikkagassatik ilikkarsimaneraat paasiniassallugu. Taakkua aallaavigalugit ilinniartitsisut alloriarfimmi tullermut atuartitsinissartik piareersarsinnaanngussavaat.

Angajullernut alloriarfik naammassigaanni inaarutaasumik naliliisoqassaaq. Inaarutaasumik naliliinerit naammassippata atuartut atuarsimanerminnut uppernarsaammik tunineqassapput.

Malugiuk
Kommunalbestyrelsip angajoqqaat qinnuteqareernerisigut atuartoq ukiuni qulingiluani atuareersimappat atuarunnaarnissaanik akuerisinnaavaa, tamanna immikkut patsisissaqartinneqarpat aatsaat. Atuartoq ukiuni qulingiluani atuareernermi kingorna atuarunnaarnissaminik akuerineqassappat, inuussutissarsiummik ilinniarnermillu ingerlatsinissaa aallarnisaqqaartariaqarpoq.

Meeqqanut, Kulturimut Sunngiffimmullu Ingerlatsivik
Noah Mølgårdip aqq. 9
Postboks 1023
3952 Ilulissa
Telefon.: 947800

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl