Aallarneq angerlarnerlu

Nalinginnaasumik paasissutissiineq 

Atuartoq Danmarkimi efterskolertussanngoraagat Namminersorlutik Oqartussat angalanermut aningaasartuutinut tapiissuteqartarput. Atuartunik akikinnerusumik efterskolertitsisoqartarnissaa anguniarlugu tapiissuteqartoqartarpoq.

Aallarnissap angerlarnissallu ilissi nammineerlusi aaqqissuunnissaanut periarfissaqarpusi, imaluunniit Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfimmit aamma angalanissat aaqqissuunneqarsinnaapput.

Danmarkimut angalaneq 

Angalanerit angajoqqaanit aaqqissuussaasut
Ilissi angajoqqaatut atuartup angalanissaa aaqqissuussinnaavarsi, angalanerup angajoqqaanit aaqqissugaasumik taaneqartarpoq. Tamatumalu nassataanik ilissi nammineerlusi:
  • Danmarkimut atuartup billetsissaa inniminnissavarsi akilerlugulu
  • Tikinnermi atuartup aaneqarnissaa isumagalugu
  • Atuartup efterskolimut apuunnissaa isumagalugu

Angalanermut aningaasartuutisi timmisartumut billetsit akikinnerpaat nalingisa annertoqutaat utertissinnaavarsi, taanna aamma taaneqartartoq billetsi allanngortinneqarsinnaanngitsoq. Aningaasartuutit utertinniarussigit atuartup angalaneranut akiliutip uppernarsaataa Oqaatsinik Pikkorissarfimmut nassiutissavarsi, ilanngullugu atuartup inuuiata normua aamma bankimi konto normu utertitsivissatut atorneqartussaq paasissutissiissutigalugit.

Angalanerit Naalakkersuisoqarfimmit aaqqissuussaasut
Angalanerit Naalakkersuisoqarfimmit aaqqissuussaappata, nassataanik imaattoqassaaq:
  • Danmarkimut billetsi Naalakkersuisoqarfimmit inniminnerneqarlunilu akilerneqassaaq, atuartoq Kalaallit Nunaanni suminngaanneeraluarpalluunniit
  • Angalanerup aqqutaani unnuiffiusariaqartut nerisassallu aningaasartuutaaneri Naalakkersuisoqarfimmit akilerneqassapput

Angalanermi pisariaqartut 

Københavnimi niuffiorneqarneq
Angalaneq Naalakkersuisoqarfimmit aaqqissuussaatillugu, atuartut ataatsikkut amerlasuujutillugit angalatinneqartarput, atuarnerullu aallartinnissaanut ullut marluk sioqqullugit Kalaallit Nunaanniit aallartinneqartarlutik. Tamatuma saniatigut Københavnimut tikikkunik kalaallit illuanni sulisunit niuffiorneqartarput.

Ilaqutariinnik attaveqaataasunik suleqateqarneq
Atuartup efterskolimut apuunnissaa kalaallit illuanni sulisunit isumagineqartarpoq, nalinginnaasumillu ilaqutariit attaveqaataasut suleqatigalugit tamanna pisarluni.

Aamma ilissi nammineerlusi atuartup Kastrupimut ilaqutariit attaveqaataasunit aaneqarnissaa isumagitissinnaavarsi, imaluunniit kalaallit illuanni sulisut ilaqutariit attaveqaataasunukaanneqarnissaa isumagitissinnaallugu, taakkulu tamatuma kingorna efterskolimukaannissaa isumagalugu.

Ilissi akisussaasuussaasi
Atuartup atuariartortut allat angalaqatigigaluarai, atuartup aqqutit eqqortut atorlugit mittarfimmut qaninnerpaamut apuunnissaanut ilissi angajoqqaatut akisussaaffigaarsi.

Atuartoq kisimiilluni angalassappat, atuartup Københavnip tungaanut aqqutit eqqortut atorlugit angalanissaa ilissi aamma angajoqqaatut akisussaaffigaarsi.

Atuartut nunaqarfimmeersut
Aallaaviatigut Naalakkersuisoqarfimmit nunaqarfimmiit illoqarfimmut angalanissamut billetsi inniminnerneqartarpoq, ilissili angajoqqaatut angalanissaq nammineq isumaginiarussiuk, angallatit oqartussanit akuerineqartut aqqutigalugit ingerlasimagussi aatsaat tassunga aningaasartuutaasimasut utertinneqarsinnaapput.

Angerlamut angalaneq 

Angerlamut angalaneq kalaallit illuanni sulisumit efterskolimut attaveqartumit aaqqissuunneqassaaq.

Ilissi aamma nammineq tamanna aaqqissuussinnaavarsi, aallarnermisulli maleruagassat malillugit billetsinut aningaasartuutit utertissinnaallusigit.

Kissaatit immikkut ittut
Angerlamut angalanermut atatillugu immikkut ittunik kissaateqassagussi, immersuiffissaq ”Kalaallit Nunaannut angerlarnermut immersuiffissaq” immersussavarsi, taannalu kalaallit illuannut atuartup attaveqartarfianut nassiullugu. Atuarunnaarnissaq qaammatit tallimat sioqqullugu immikkut kissaatisi nalunaarutigissavasi.

Immersuiffissaq ”Kalaallit Nunaannut angerlarnermut immersuiffissaq” aajuk

Qinnuteqarnissamut killiliussat 

Billetsit angajoqqaat e-mail-iinut kommunimilu sulisumut efterskolinut tunngasunik suliaqartumut nassiunneqassapput.

Kissaatisi allanngortissinnaavasi
Billetsip atulersinneqarnissaata tungaanut kissaatisi allanngortissinnaavasi. Billetsip atuutilersinneqarnerata kingorna allannguuteqarnermi aningaasartuutaanerusoqassappat, ilissi nammineerlusi taakku akilissavasi. Angalanermut kissaatini allannguuteqartitsissagussi Oqaatsinik Pikkorissarfimmut attaveqassaasi.

Angerlamut angalaneq
Atuartup angerlarluni angalanissaanut immikkut kissaateqassagussi, atuarunnaarnissamut qaammatit tallimat sioqqullugit kalaallit illuannut nalunaaruteqassaasi, aammalu atuartoq ilaqutariit attaveqaataasuni atuarfiup naaneranit angerlamut aallarnissap tungaanut najugaqarsinnaanersoq ilanngullugu nalunaarutigalugu.

Allaaserisat attuumassutillit

Oqaatsinik Pikkorissarfik
Siimuup Aqq. 32
Box 3019
3911 Sisimiut
Kalaallit Nunaat

Oqarasuaat: (+299) 86 67 00
Fax: (+299) 86 68 00
E-mail: sprogcenter@oqaatsit.gl

Allaffiup ammarsarfii
Ulluinnarni 8.00-16.00

Oqarasuaatikkut ammasarfiit
Ulluinnarni 9.00-12.00 aamma 13.00-15.00