Akileraarutinut ilanngaatit

Nalinginnaasumik paasissutissiineq 

Ilanngaat tassaavoq isertitannit ilanngaatigineqartussaq akileraarutinut akiliissutissavit inaarutaasumik annertussusilinnginnerani.

Ilanngaatit assigiinngitsorpassuupput. Ilanngaatit ilaat siumoortumik nalunaarsuinermi aammalu nammineerluni nalunaarsuinermi atugassanik naqitani ilaareertarput, ilaalli illit nammineq paasititsissutigisassaraatit. Taamaattumik pingaartuuvoq siumoortumik nalunaarusiamik aammalu nammineerluni nalunaarsuinermi atugassamik naqitap misissornissaat, paasissutissat tamarmik ilaanersut paasissutissiissutillu eqqortuunerat qulakkeerniarlugit.

Tamatuma saniatigut soraarnerussutisiaqarneq, meeqqanut akilersuutinut aalajangersimasunillu aningaasartuutinut atatillugu maleruagassat arlallit immikkut ittut nammineerluni naatsorsuutivit immersornerani eqqumaffigisassatit.

Ilanngaatit pillugit apeqqutissaqaruit Akileraartarnermut Aqutsisoqarfimmut attaveqarsinnaavutit.

Maleruagassat 

Pingaarnertut atuupput:
• Annertunerpaamik isertitannit 20 % angullugu ilanngaatigisinnaavatit soraarnerussutisiaqalernissamut akiliut
• Aningaasat akilersimasatit kisiisa ilanngaatigisinnaavatit
• Inummut ilanngaat inaarummik naatsorsuinermi ilanngaatigineqartarpoq

Soraarnerussutisiaqarneq
Soraarnerussutisiaqalernissamik aaqqiinermut sulisitsisut akiliisuuppat, akiliutai ilanngaatigissanngilatit. Soraarnerussutisiaqalernissamut nammineq toqqortikkat ilanngaatiginiaraanni aaqqissuussinerit soraarnerussutisiaqarnissamut aningaasaateqarfimmi Kalaallit Nunaanni angerlarsimaffeqartumi, imaluunniit aningaaserivimmi Kalaallit Nunaanni angerlarsimaffeqartumi imaluunniit aalajangersimasumik ingerlatsiveqartumi, pilersinneqarsimasussaapput.


Akilersuutit
Meeqqatit najugaqatiginngikkukkit meeqqanullu aapparisannulluunniit akilersuillutit, akilersuutit ilanngaatiginissaannut periarfissaqarpoq.

Aningaasartuutigisimasat
Aningaasartuutigisimasatit ilanngaammit aalajangersimasumit annertuneruppata, aningaasartuutigisimasatit ilanngaatigisinnaavatit. Aalajangersimasumik ilanngaatinit aningaasartuutaasimasunillu ataatsikkut ilanngaateqartitsisinnaanngilatit.

Ilanngaatit nammineerluni nalunaarsuinermi atugassamik ilaatinneqartartut 

Ilanngaatit nammineerluni nalunaarsuinermi atugassamik ilaatinneqartartut makkuupput:
• Ilanngaat aalajangersimasoq, taamaallaalli Imminut sullinnissamut quppernerini
• Akiitsut erniaat soorlu kalaallit danskillu aningaaseriviinut taarsigassarsiniartarfinnullu
• ESU-mut akiitsut (ErhvervsStøtteUdvalget) aamma BSU (BoligStøtteUdvalget)
• Soqutigisaqaqatigiiffiit ilaannut ilaasortaanermut akiliut

Akileraaruseriffimmi paasissutissat pigineqartut, ilaatigut tassaapput sulisitsisumit, aningaaserivinnit taarsigassarsiniartarfinnillu paasissutissiissutit.

Malugiuk
Aalajangersimasumik illuutit, Kalaallit Nunaata avataaniittut pillugit akiitsut aningaasartuutai erniallu aningaasartuutai ilanngaatitaqanngillat.

Ilanngaatit nammineerluni nalunaarsuinermi atugassamik ilaatinneqarneq ajortut 

Ilanngaatit nammineerluni nalunaarsuinermi atugassamik ilaatinneqarneq ajortut soorlu makkuusinnaapput:
• Pilersuisussaatitaanermi akilikkat
• Inuinnarnit taarsigassarsiat erniaat
• Inuuneq naallugu naafferartumik tigusaqarfiusussanut soraarnerussutisiassanut inuunermullu sillimmasiinermut nammineerluni akiliutit, nunanut allanuunngitsoq.
Akileraartarnermut Aqutsisoqarfik
Postboks 1605
3900 Nuuk

Oqarasuaat: 34 65 00
Fax: 32 20 42
E-mail: tax@nanoq.gl
Nittartagaq: www.aka.gl

Ammasarfii:
Ataasinngorneq: 10.00 - 15.00
Marlunngorneq: 10.00 - 15.00
Pingasunngorneq: MATOQQAVOQ
Sisamanngorneq: 10.00 - 17.00
Tallimanngorneq: 10.00 - 15.00
Akileraartarnermut Aqutsisoqarfik
Siunnersuineq Nakkutilliinerlu
Postboks 1605
3900 Nuuk

Oqarasuaat: 34 50 00
Fax: 32 20 42
E-mail: tax@nanoq.gl
NIttartagaq: aka.gl