Akileraarutit A-t aamma B-t

Nalinginnaasumik paasissutissiineq 

Akileraariaatsit assigiinngillat. Nalinginnaanerpaapput akileraarutit A-t aamma B-t, tassaappullu aningaasarsiannit A-nit B-nillu akileraarutit.

Akileraarutit A-t aamma B-t pillugit apeqqutissaqaruit, najukkanni akileraartarnermut allaffimmut saaffiginnissinnaavutit.

Akileraarutit A-t
Akileraarutit A-t tassaapput aningaasarsiannit A-nit akileraarutit.

Aningaasarsiat A-t tassaasinnaapput:
  • Sulisitsisunnit akissarsiatit
  • Namminersorlutit akissarsiatit, assersuutigalugu oqaatsinik nutserisutut
  • Siulersuisuni ilaasortatut aningaasarsiatit
  • Soraarnerussutisiatit

Akileraarutit A-t tassaapput akileraarutaagallartussat. Taakku siumoortumik nalunaarsuinitit tunngavigalugit naatsorsorneqartarput, tassalu ukiumi akileraarfiusussami illit isertitassatut naatsorsuutitit.

Ukioq naappat aningaasarsiatillu A-t qulakkeerlugit annertussusivii ilisimaneqalerpata, iluarsiissuteqartoqassaaq. Imaappoq akileraarnikippallaarsimaguit ilassummik akileraartinneqassaatit. Taakku taaneqartarput akileraarutissat sinneri. Akileraarpallaarsimaguilli utertuussaatit, akileraarpallaarsimanermillu taaneqartarput. Pisortanut akiitsoqarsimanngikkuit, Akileraartarnermut Aqutsisoqarfimmit utertoorutissatit tunniunneqassapput. Pisortanut akiitsoqaruit akiitsutit utertooruteqannginninni akiliutitut atorneqassapput, tamatumalu kingorna akiliuteqarsimaneq pillugu allagarsitinneqassaatit.

Akileraarutit B-t
Akileraarutit B-t tassaapput aningaasarsiannit B-nit akileraarutit.

Aningaasarsiat B-t tassaasinnaapput:
  • Namminersorlutit suliffiutinnit isertitatit
  • Ilinniagaqarnersiutit
  • Erniat
  • Aalisarlutit, nunami imaanilu piniarlutit pisavit tuninerini akissarsiatit

Akileraarutit B-t akileraarutaagallarputtaaq. Taamatuttaaq siumoortumik isertitassannut nalunaarsuinermi, akileraaqqinnissami utertoornissamilu kiisalu pisortanut akiitsut ilanngaaviginissaat malinneqassapput.

Aningaasarsiannit B-nit akileraarnikippallaarsimaguit, siumoortumik nalunaarsuinitit tunngavigalugit agguataartumik ukiumut quleriarlutit akiligassinneqassaatit.
Akileraartarnermut Aqutsisoqarfik - Ilulissat
Kussangajaannguaq 44
Postboks 1022
3952 Ilulissat

Oqarasuaat: 34 60 00
Fax: 94 21 77
E-mail: tax@nanoq.gl

Ammasarfii:
Ataasinngorneq: 10.00 - 15.00
Marlunngorneq: 10.00 - 15.00
Pingasunngorneq: MATOQQAVOQ
Sisamanngorneq: 10.00 - 17.00
Tallimanngorneq: 10.00 - 15.00