Aalajangeqqitassanngortitsissummut akissuteqaat nassiuguk

Aalajangeqqitassanngortitamut akissut

Paasissutissat nalinginnaasut 

Illuatungerisat eqqartuussisoqarfiup imal. Kalaallit Nunaanni Eqqartuussiviup suliami aalajangiineranik maalaarutiginnissimappat aalajangeqqitassanngortitsissummut akissuteqaat atussavat.

Illuatungerisat maalaarnermigut aalajangeqqitassanngortitsivoq. Illuatungerisavit aalajangeqqitassanngortitsineranut akissuteqaatit aalajangeqqitassanngortitsissummut akissuteqaammik taaneqartarpoq.

Eqqartuussisoqarfiup imal. Kalaallit Nunaanni Eqqartuussiviup aalajangiineri Nunatta Eqqartuussissuuneqarfianut aalajangeqqitassanngortinneqartarput.

Maluginiaruk, aalajangiinerit kisimik aalajangeqqitassanngortinneqarsinnaapput. Suliami eqqartuussuteqartoqarsimappat eqqartuussullu maalaarutigerusukkukku suliareqqitassanngortitsissut nassiutissavat. Illuatungerisat suliareqqitassanngortitsissummik nassiussisimappat illillu akissuteqaammik nassiusserusukkuit, taava suliareqqitassanngortitsissummut akissuteqaammik nassiussissaatit.

Sulianut aalajangeqqitassanngortinneqarsimasunut Nunatsinni Eqqartuussivinni suliarineqartunut suugaluartunulluunniit tunngatillugu akissuteqassaguit immersugassaq quppernerup matuma qulaaniittoq atorsinnaavat.

Siunnersuineq 

Eqqartuussisut kalluunnaveersaartuusussaagamik suliap pitsaanerpaamik qanoq ingerlanneqarsinnaanera pillugu siunnersorsinnaanngilaatsit. Taamaattumik suliassanngortitsiniaruit imaluunniit suliareqqitassanngortitsiniaruit kajumissaassavatsigit eqqartuussissuserisoq imaluunniit inatsisitigut siunnersuisarfik, IKIU, attavigissagit.

Eqqartuussissuserisup IKIU-lluunniit misissuissussinnaavaatit naalagaaffiup akiligaanik eqqartuussissuserisulerneqarsinnaanersutit (fri proces) aamma periarfissatit allat pillugit siunnersorsinnaavaatit.

IKIU-p nittartagaa takuuk (nutaami ammassaaq)

Nunatsinni eqqartuussissuserisut allattorsimaffiat takuuk (nutaami ammassaaq)

Piumasaqaatit 

Nunatsinni eqqartuussisoqarfiup imal. Kalaallit Nunaanni Eqqartuussiviup inerniliisimanera isumaqatigigukku akissuteqaammik nassiussisariaqanngilatit.

Nunatsinni eqqartuussisoqarfiup imal. Kalaallit Nunaanni Eqqartuussiviup inerniliisimanera isumaqatiginngikkukku aalajangeqqitassanngortitsissummut akissuteqaammik nassiussaqassaatit, tassanilu allaaserissavat suliaq Nunatta Eqqartuussisuuneqarfiani qanoq inerneqartikkusunnerlugu.

Suliap inernissaa pillugu kissaatit piumasaqaammik taaneqartarpoq. Aalajangeqqitassanngortitsissummut akissuteqaatit piumasaqaatinnik imalik Nunatta Eqqartuussisuuneqarfiata piffissaliussaa qaangiutsinnagu tiguneqareersimassaaq.

Aalajangeqqitassanngortitsissummut akissuteqaatit piffissaliussaq qaangiutsinnagu tiguneqarsimanngippat Nunatta Eqqartuussisuuneqarfiata naatsorsuutigissavaa Nunatsinni eqqartuussisoqarfiup imaluunniit Kalaallit Nunaanni Eqqartuussiviup inerniliisimanera isumaqatigigit.

Akigititat 

Aalajangeqqitassanngortitsissummut akissuteqaammik nassiussiguit eqqartuussivimmut akitsuummik akiliissanngilatit.

Aalajangeqqitassanngortitsissummut akissuteqaat nassiuguk 

Aalajangeqqitassanngortitsissummut akissuteqaat nassiussinnaavaat internetikkut immersugassaq atorlugu.

Tuugassaq sungaartoq, allakkat uku qulaatungaanniittoq, ”Aalajangeqqitassanngortitsissummut akissuteqaat” toorlugu immersugassaq takusinnaavat. Immersugassaq immersulerukku NemID atussavat.

Immersugassaq iserfigigukku immersuinissannik ilitsersorneqassaatit.

Maluginiaruk
Ilanngussat, Kalaallit Nunaanni Eqqartuussiviup suliamik suliaqarnerani atorneqartut, nassiutissanngilatit. Taakku Nunatta Eqqartuussisuuneqarfianut eqqartuussivimmiit tunniunneqassapput.
Ilanngussanik nutaanik saqqummiussaqarusukkuit taakku akissuteqaatinnut ilanngullugit nassiutissavatit.

Immersugassaq immersoreerukku ”nassiuguk” tuussavat. Taava akissuteqaatit Nunatta Eqqartuussisuuneqarfianut nassiunneqassaaq.

Suliamut ingerlatseriaaseq 

Nunatta Eqqartuussisuuneqarfiata suliaq tiguguniuk misissoqqaassavaa eqqartuussivimmut akitsuummik akiliisoqassanersoq aamma akitsuut akilerneqarsimanersoq.

Eqqartuussivimmut akitsuummik akiliisoqassanngippat suliaq ingerlaannaq suliarineqalissaaq.

Eqqartuussivimmut akitsuummik akiliisoqassappat taanna akilerneqareerpat aatsaat suliaq suliarineqalissaaq.

Suliap suliarineqarnera
Suliaq suliaralugu aallartinneqarpat Nunatta Eqqartuussisuuneqarfiata illuatungeriit allaffigissavai. Illuatungeriit allanik oqaaseqarnissaminnut piffissaliivigineqassapput.

Piffissaliussaq qaangiuppat Nunatta Eqqartuussisuuneqarfia suliami aalajangiissaaq. Aalajangeqqitassanngortitsisoqarsimatillugu illuatungeriinnik ataatsimiititsisarneq qaqutigoortorujussuuvoq. Suliat taamaattut tamatigungajak suliarineqartarput allakkiat pigineqareersut tunngavigalugit.

Ataatsimiittoqarnissaa kissaatigigukku Nunatta Eqqartuussisuuneqarfia attavigisinnaavat. Taava ataatsimiinnissaq pisariaqarnersoq isummerfigineqassaaq.

Aalajangiineq
Nunatta Eqqartuussisuuneqarfia suliami aalajangeereerpat aalajangiineq illuatungeriinnut nassiunneqassaaq.

Nunatta Eqqartuussisuuneqarfiata suliamik suliaqalerneraniit aalajangiinissaanut qaammatip ataatsip missaa ingerlakkajuttarpoq.

Eqqartuussivimmut akitsuut akilerneqareerpat aatsaat suliaq suliarineqalissaaq.

Allannguutit 

Aalajangiinerit eqqartuussivimmit aalajangiisuusimasumit allanngortinneqarsinnaapput suliami paasissutissanik nutaanik takkuttoqarpat.

Eqqartuussisoqarfiit imal. Kalaallit Nunaanni Eqqartuussiviup aalajangiineri Nunatta Eqqartuussisuuneqarfianit allanngortinneqarsinnaapput.

Piffissaliussat 

Illit illuatungerisalluunniit aalajangeqqitassanngortitsisinnaavoq aalajangiisoqarneraniit sap. akunneri marluk qaangiutsinnagit. Pissutsinik immikkut illuinnartunik atuuttoqartillugu sap. akunneri marluk qaangiutereeraluartut aalajangeqqitassanngortitsisoqarsinnaavoq.

Nunatta Eqqartuussisuuneqarfiata suliaq suliaralugu aallartikkuniuk allaffigissavaatit, taakkunanilu paasitissavaatit aalajangeqqitassanngortitsissummut akissuteqaatit kingusinnerpaamik qaqugu nassiutissagit.

Maalaaruteqarneq 

Nunatta Eqqartuussisuuneqarfiata aalajangiineri taamaallaat Ingerlatitseqqiinissamik Aalajangiisartut akuersissuteqarnerisigut Eqqartuussiviit Qullersaannut aalajangeqqitassanngortinneqarsinnaapput. Aatsaat suliaq tunngavimmigut pingaaruteqarpat Ingerlatitseqqiinissamik Aalajangiisartut akuersissuteqartarput.

Suliaq tunngavimmigut pingaaruteqarsinnaavoq:

  • apeqqut Eqqartuussiviit Qullersaata siornatigut suliarinikuunngisaanut tunngappat, aamma
  • aalajangiineq allanut, suliami illuatungeriinnuunnaanngitsoq, pingaaruteqarsinnaappat

Nunatta Eqqartuussisuuneqarfiata aalajangiinera Eqqartuussiviit Qullersaannut ingerlatikkusukkukku qinnuteqaatit uunga nassiutissavat:
  • Nunatta Eqqartuussisuuneqarfia, postboks 1040, 3900 Nuuk imaluunniit
  • Procesbevillingsnævnet Store Kongensgade 1-3, 2., 1264 København K


Nunatta Eqqartuussisuuneqarfiata aalajangiineranik Eqqartuussiviit Qullersaannut aalajangeqqitassanngortitsinissaq pillugu akuersissuteqarnissamik qinnuteqaatit Nunatta Eqqartuussisuuneqarfianit imaluunniit Ingerlatitseqqiinissamik Aalajangiisartunit kingusinnerpaamik tiguneqareersimassaaq Nunatta Eqqartuussisuuneqarfiata aalajangiineraniit sap. akunneri sisamat qaangiunneranni. Qanga aalajangiisoqarsimanera Nunatta Eqqartuussisuuneqarfiani eqqartuussisut suliaannik allassimaffimmi allaqqasarpoq.

Ingerlatitseqqiinissamik Aalajangiisartut nittartagaat takuuk (nutaami ammassaaq)

Inatsisit 

Aamma atuarsinnaasatit

Nunatta Eqqartuussisuuneqarfia
Jens Kreutzmannip Aqq. 5
3900 Nuuk

Oqarasuaat: 36 39 00
E-mail: post.landsret@domstol.gl
Nittartagaq: www.domstol.gl
Ikiu: www.ikiu.gl
Advokatnøglen: www.advokatnoeglen.dk
Ingerlatitseqqiinissamik Aalajangiisartut: www.domstol.dk/procesbevillingsnaevnet/