Aalajangeqqitassanngortitsissut eqqartuussisoqarfimmut imal. Kalaallit Nunaanni Eqqartuussivimmut nassiuguk

Aalajangeqqitassanngortitsineq

Paasissutissat nalinginnaasut 

Eqqartuussisoqarfiup imal. Kalaallit Nunaanni Eqqartuussiviup aalajangiinera maalaarutigerusukkukku aalajangeqqitassanngortitsissut atussavat.

Aalajangiinermik maalaarutiginninneq aalajangeqqitassanngortitsineruvoq.

Eqqartuussisoqarfiup imal. Kalaallit Nunaanni Eqqartuussiviup aalajangiineri Nunatta Eqqartuussisuuneqarfianut aalajangeqqitassanngortinneqartarput.

Maluginiaruk, aalajangiinerit kisimik aalajangeqqitassanngortinneqarsinnaapput. Aalajangiineq assersuutigalugu makkununnga tunngasinnaavoq: suliap eqqartuussivimmi suliarineqarnerani meeraq sumi najugaqassasoq, illuatungiusoq videokkut eqqartuussinermi peqataasinnaanersoq assingusulluunniit.

Suliami eqqartuussuteqartoqarsimappat eqqartuussullu maalaarutigerusukkukku suliareqqitassanngortitsissummik nassiussissaatit.

Suliat eqqartuussisoqarfimmi imal. Kalallit Nunaanni Eqqartuussivimmi suliarineqartut suugaluartulluunniit aalajangeqqitassanngortinneqarnerannut tunngatillugu allakkiaqarnerni immersugassaq quppernerup matuma qulaaniittoq atorsinnaavat.

Siunnersuineq 

Eqqartuussisut kalluunnaveersaartuusussaagamik suliap pitsaanerpaamik qanoq ingerlanneqarsinnaanera pillugu siunnersorsinnaanngilaatsit. Taamaattumik suliassanngortitsiniaruit imaluunniit suliareqqitassanngortitsiniaruit kajumissaassavatsigit eqqartuussissuserisoq imaluunniit inatsisitigut siunnersuisarfik, IKIU, attavigissagit.

Eqqartuussissuserisup IKIU-lluunniit misissuissussinnaavaatit naalagaaffiup akiligaanik eqqartuussissuserisulerneqarsinnaanersutit (fri proces) aamma periarfissatit allat pillugit siunnersorsinnaavaatit.

IKIU-p nittartagaa takuuk (nutaami ammassaaq)

Nunatsinni eqqartuussissuserisut allattorsimaffiat takuuk (nutaami ammassaaq)

Piumasaqaatit 

Eqqartuussisoqarfiup imal. Kalaallit Nunaanni Eqqartuussiviup aalajangiinera illit kissaatinnit (piumasaqaatit), eqqartuussisunut ilisimatitsissutigisimasannit, allaaneruppat aalajangeqqitassanngortitsisinnaavutit.

Piumasaqaatit eqqartuussisunit malinneqarsimappat aalajangeqqitassanngortitsisinnaanngilatit.

Eqqartuussisoqarfiup imal. Kalaallit Nunaanni Eqqartuussiviup aalajangiinera isumaqatiginngikkukku aalajangiinermiit sap. akunneri marluk qaangiutsinnagit aalajangeqqitassanngortitsisinnaavutit. Aalajangeqqitassanngortitsinermut piffissaliussaq pillugu ataani paasisaqarnerusinnaavutit.

Aalajangeqqitassanngortitsiniaruit allakkiaq eqqartuussivimmut aalajangiisuusimasumut, tassa eqqartuussisoqarfimmut imal. Kalaallit Nunaanni Eqqartuussivimmut, nassiutissavat. Nunatta Eqqartuussisuuneqarfianut nassiutissanngilat.

Aalajangeqqitassanngortitsiguit ilisimatitsissutigissavat Nunatta Eqqartuussisuuneqarfia qanoq inerniliitikkusunnerit.

Akigititat 

Aalajangeqqitassanngortitsinerit ilaat kr. 400-nik akitsuuserneqartarput. Eqqartuussivimmut akitsuummik akiliissanerlutit eqqartuussivik aalajangiisuusimasoq paasiniaavigissavat.

Eqqartuussivimmut akitsuummik akiliissaguit aningaasat Kalaallit Nunaanni Eqqartuussiviup Grønlandsbankimi kontoanut uunga ikissavatit: 6471-1032663.

Akiliinermi makku ilisimatitsissutigissavatit:

  • Atit
  • Illuatungerisavit atia
  • Illit nammineq suliamut normut, peqaruit
  • Eqqartuussiviup suliamut normuliussaa, ilisimatitsissutigineqarsimappat.


Eqqartuussivimmut akitsuut aalajangeqqitassanngortitsissut nassiutsinnagu akilersimagukku Nunatta Eqqartuussisuuneqarfiata kajumissaassavaatit akiliisimanermut uppernarsaat aalajangeqqitassanngortitsissummut ilanngullugu nassiutissagit.

Eqqartuussivimmut akitsuutip akilersimaneranut uppernarsaat aalajangeqqitassanngortitsissummut ilanngullugu tiguneqarsinnaappat tamanna suliap suliarineqarneranut sivikillisaataassaaq. Suliarmi aatsaat aallartinneqassaaq eqqartuussivimmut akitsuutip akilerneqarsimanera qularnaarneqarpat.

Aalajangeqqitassanngortitsissut nassiuguk 

Immersugassaq ammarukku immersuinissannik ilitsersorneqassaatit.

Immersuereeruit immersukkat naqitanngorteriarlugu eqqartuussivimmut aalajangiisuusimasumut nassiutissavat.

Immersugaq nassiussinnaavat:

  • Mailikkut, eqqartuussivimmut aalajangiisuusimasumut
  • Allakkatigut, eqqartuussivimmut aalajangiisuusimasumut


Imaluunniit immersukkat eqqartuussivimmut najugaqarfinnut qaninnermiittumut tunniussinnaavat.

Eqqartuussisoqarfiit aamma Kalaallit Nunaanni Eqqartuussivik qanoq attaveqarfigisinnaallugit paasisaqarusukkuit una tooruk (nutaami ammassaaq)

Maluginiaruk
Allakkiaq eqqartuussisuuneqarfimmut nassiutissanngilat.

Suliamut ingerlatseriaaseq 

Allakkiat tiguguniuk eqqartuussiviup aalajangiisuusimasup aalajangiinini allanngortissanerlugu nalilersoqqaassavaa.

Eqqartuussiviup aalajangiisuusimasup aalajangiisimanini allanngortissanngikkuniuk illit allakkiat suliamilu ilanngussat Nunatta Eqqartuussisuuneqarfianut nassiutissavai.

Suliap suliarineqarnera
Nunatta Eqqartuussisuuneqarfiata suliaq tiguguniuk misissoqqaassavaa eqqartuussivimmut akitsuummik akiliisoqassanersoq aamma akitsuut akilerneqarsimanersoq.

Eqqartuussivimmut akitsuummik akiliisoqassanngippat suliaq ingerlaannaq suliarineqalissaaq. Eqqartuussivimmut akitsuummik akiliisoqassappat taanna akilerneqareerpat aatsaat suliaq suliarineqalissaaq.

Suliaq suliaralugu aallartinneqarpat Nunatta Eqqartuussisuuneqarfiata illuatungeriit allaffigissavai. Illuatungeriit allanik oqaaseqarnissaminnut piffissaliivigineqassapput.

Piffissaliussaq qaangiuppat Nunatta Eqqartuussisuuneqarfia suliami aalajangiissaaq. Aalajangeqqitassanngortitsisoqarsimatillugu illuatungeriinnik ataatsimiititsisarneq qaqutigoortorujussuuvoq. Suliat taamaattut tamatigungajak suliarineqartarput allakkiat pigineqareersut tunngavigalugit.

Ataatsimiittoqarnissaa kissaatigigukku Nunatta Eqqartuussisuuneqarfia attavigisinnaavat. Taava ataatsimiinnissaq pisariaqarnersoq isummerfigineqassaaq.

Aalajangiineq
Nunatta Eqqartuussisuuneqarfia suliami aalajangeereerpat aalajangiineq illuatungeriinnut nassiunneqassaaq.

Nunatta Eqqartuussisuuneqarfiata suliamik suliaqalerneraniit aalajangiinissaanut qaammatip ataatsip missaa ingerlakkajuttarpoq.

Allannguutit 

Aalajangiinerit eqqartuussivimmit aalajangiisuusimasumit allanngortinneqarsinnaapput suliami paasissutissanik nutaanik takkuttoqarpat.

Eqqartuussisoqarfiit imal. Kalaallit Nunaanni Eqqartuussiviup aalajangiineri Nunatta Eqqartuussisuuneqarfianit allanngortinneqarsinnaapput.

Piffissaliussat 

Aalajangiineq aalajangeqqitassanngortissavat aalajangiisoqarneraniit sap. akunneri marluk qaangiutsinnagit. Allakkatigut taamaaliorsinnaavutit. Allakkatit nammineq tunniussinnaavatit imaluunniit allagaqanngikkaluarlutit eqqartuussivik aalajangiisuusimasoq sianerfigalugu aalajangeqqitassanngortitsinnaavutit.

Eqqartuussinermi illit najuuffiginngisanni aalajangiisoqarsimappat piffissaliussinermut tunngatillugu apeqqutaavoq eqqartuussisoqarfiup imal. Kalaallit Nunaanni Eqqartuussiviup qaqugu aalajangiiumaarneranik paasitinneqarsimanersutit.

Qaqugu aalajangiisoqarnissaanik paasitinneqarsimaguit aalajangiinermiit sap akunneri marluk qaangiutsinnagit aalajangeqqitassanngortitsissaatit. Qanga aalajangiisoqarsimanera eqqartuussisut suliaannik allassimaffimmi, eqqartuussisoqarfimmit imal. Kalaallit Nunaanni Eqqartuussivimmit tigusimasanni, allassimavoq.

Qaqugu aalajangiisoqarnissaa pillugu paasitinneqarsimanngikkuit aalajangiinerup eqqartuussisoqarfimmit imal. Kalaallit Nunaanni Eqqartuussivimmit tiguneraniit sap. akunneri marluk qaangiutsinnagit aalajangeqqitassanngortitsissaatit.

Piffissaliussaq qaangiutereersoq aalajangeqqitassanngortitsiguit aalajangeqqitassanngortitsinerit itigartitsissutigineqassaaq. Aatsaat piffissaq eqqorlugu aalajangeqqitassanngortitsinissannut periarfissaqarsimanngikkuit akuerineqassaaq.

Piffissaliussaq qaangiutereersoq aalajangeqqitassanngortitsinissamut akuerineqarneq
Aalajangeqqitassanngortitsinissamut akuerineqarnissat piffissaliussap qaangiutereernerani qinnuteqaatigerusukkukku taava aalajangiisoqarneraniit qaammatit arfinillit qaangiutsinnagit eqqartuussivik aalajangiisuusimasoq attaveqarfigissavat, sunalu pissutigalugulu piffissaliussap iluani aalajangeqqitassanngortitsisinnaasimannginnerit ilisimatitsissutigissavat.

Piffissaliussap qaangiutereernerani aalajangeqqitassanngortitsisinnaasimannginnermut pissutaasinnaasut tamaasa allaaserinissaat ajornarpoq, kisianni assersuutigalugu akuerineqarsinnaavutit napparsimmavimmi uninngallutit ilisimajunnaaqqasimanerit pissutigalugu piffissaliussaq eqqortissinnaasimanngikkukku.

Piffissaliussaq puigorsimagukku imaluunniit suliassat allat ulapputigisimagukkit piffissaliussap qaangiutereernerani aalajangeqqitassanngortitsinissamut akuerisaanissat ilimagissanngilat.

Maalaaruteqarneq 

Nunatta Eqqartuussisuuneqarfiata aalajangiineri taamaallaat Ingerlatitseqqiinissamik Aalajangiisartut akuersissuteqarnerisigut Eqqartuussiviit Qullersaannut aalajangeqqitassanngortinneqarsinnaapput. Aatsaat suliaq tunngavimmigut pingaaruteqarpat Ingerlatitseqqiinissamik Aalajangiisartut akuersissuteqartarput.

Suliaq tunngavimmigut pingaaruteqarsinnaavoq:

  • apeqqut Eqqartuussiviit Qullersaata siornatigut suliarinikuunngisaanut tunngappat, aamma
  • aalajangiineq allanut, suliami illuatungeriinnuunnaanngitsoq, pingaaruteqarsinnaappat

Nunatta Eqqartuussisuuneqarfiata aalajangiinera Eqqartuussiviit Qullersaannut ingerlatikkusukkukku qinnuteqaatit uunga nassiutissavat:
  • Nunatta Eqqartuussisuuneqarfia, postboks 1040, 3900 Nuuk imaluunniit
  • Procesbevillingsnævnet Store Kongensgade 1-3, 2., 1264 København K


Nunatta Eqqartuussisuuneqarfiata aalajangiineranik Eqqartuussiviit Qullersaannut aalajangeqqitassanngortitsinissaq pillugu akuersissuteqarnissamik qinnuteqaatit Nunatta Eqqartuussisuuneqarfianit imaluunniit Ingerlatitseqqiinissamik Aalajangiisartunit kingusinnerpaamik tiguneqareersimassaaq Nunatta Eqqartuussisuuneqarfiata aalajangiineraniit sap. akunneri sisamat qaangiunneranni. Qanga aalajangiisoqarsimanera Nunatta Eqqartuussisuuneqarfiani eqqartuussisut suliaannik allassimaffimmi allaqqasarpoq.

Ingerlatitseqqiinissamik Aalajangiisartut nittartagaat takuuk (nutaami ammassaaq)

Inatsisit 

Aamma atuarsinnaasatit

Nunatta Eqqartuussisuuneqarfia
Jens Kreutzmannip Aqq. 5
3900 Nuuk

Oqarasuaat: 36 39 00
E-mail: post.landsret@domstol.gl
Nittartagaq: www.domstol.gl
Ikiu: www.ikiu.gl
Advokatnøglen: www.advokatnoeglen.dk
Ingerlatitseqqiinissamik Aalajangiisartut: www.domstol.dk/procesbevillingsnaevnet/