Suliami ilaqutariinnermut tunngasumi suliareqqitassanngortitsissummik nassiussigit

Suliareqqitassanngortitsinermik suliassanngortitsissut – ilaqutariinnermut suliat eqqartuussissutigoortut

Paasissutissat nalinginnaasut 

Suliareqqitassanngortitsissut tassaavoq allakkiaq, eqqartuussisoqarfiup imal. Kalaallit Nunaanni Eqqartuussiviup suliami ilaqutariinnermut tunngasumi eqqartuussutaanik maalaaruteqarniaruit atugassat.

Eqqartuussummik maalaaruteqarneq taamaattoq suliareqqitassanngortitsinermik taaneqartarpoq. Eqqartuussut maalaarutigukku suliareqqitassanngortissavat. Eqqartuussisoqarfiup imal. Kalaallit Nunaanni Eqqartuussiviup eqqartuussutai Nunatta Eqqartuussisuuneqarfianut suliareqqitassanngortinneqartarput.

Suliaq ilaqutariinnermut tunngasoq makkununnga tunngassuteqartarpoq:

  • avinneq
  • averuserneq
  • angajoqqaatut oqartussaassuseq
  • meeqqap sumi najugaqarnissaa imaluunniit
  • meeqqamik najorteqartarneq


Eqqartuussisoqarfiup imal. Kalaallit Nunaanni Eqqartuussiviup suliaq naqinneq Æ aallarniutigalugu normulersimappagu taava suliaq ilaqutariinnermut tunngasuusimassaaq.

Suliat suut eqqartuussivinni suliarineqartarnerat pillugu uani paasisaqarnerusinnaavutit www.eqqartuussivik.gl

Siunnersuineq 

Eqqartuussisut kalluunnaveersaartuusussaagamik suliap pitsaanerpaamik qanoq ingerlanneqarsinnaanera pillugu siunnersorsinnaanngilaatsit. Taamaattumik suliassanngortitsiniaruit imaluunniit suliareqqitassanngortitsiniaruit kajumissaassavatsigit eqqartuussissuserisoq imaluunniit inatsisitigut siunnersuisarfik, IKIU, attavigissagit.

Eqqartuussissuserisup IKIU-lluunniit misissuissussinnaavaatit naalagaaffiup akiligaanik eqqartuussissuserisulerneqarsinnaanersutit (fri proces) aamma periarfissatit allat pillugit siunnersorsinnaavaatit.

IKIU-p nittartagaa takuuk (nutaami ammassaaq)

Nunatsinni eqqartuussissuserisut allattorsimaffiat takuuk (nutaami ammassaaq)

Naammassisassat piumasaqaatillu 

Piumasaqaatit eqqartuussivimmut saqqummiussimasat eqqartuussisoqarfiup imal. Kalaallit Nunaanni Eqqartuussiviup eqqartuussutaani malinneqarsimanngippat suliareqqitassanngortitsisinnaavutit.

Piumasaqaatilli eqqartuussisoqarfimmit imal. Kalaallit Nunaanni Eqqartuussivimmit malinneqarsimappat suliareqqitassanngortitsisinnaanngilatit.

Suliareqqitassanngortitsissut eqqartuussisoqarfiup imal. Kalaallit Nunaanni Eqqartuussiviup eqqartuussuteqarneraniit sap. akunneri arfineq-pingasut qaangiutsinnagit Nunatta Eqqartuussisuuneqarfiata tigoreersimassavaa. Suliareqqitassanngortitsinissamut piffissaliussat pillugit ataani paasisaqarnerusinnaavutit.

Kalaallit Nunaanni Eqqartuussiviup eqqartuussutaata nuutsinneqarnera suliareqqitassanngortitsissummut ilanngullugu nassiutissavat.

Suliareqqitassanngortitsissut pillugu piumasaqaatit
Suliareqqitassanngortitsissummut piumasaqaatit eqqartuussisarnermik inatsimmi aalajangersarneqarnikuupput. Immersugassaq quppernerup matuma qulaaniittoq atorukku ajunngitsumillu immersorsimagukku piumasaqaatit eqqartuussisarnermik inatsimmiittut eqqortissavatit.

Paasissutissat suliareqqitassanngortitsissummi amigaatigineqarpata Nunatta Eqqartuussisuuneqarfiata attaveqarfigalutit suut amigaataanersut pillugit ilitsersussavaatit.

Suliareqqitassanngortitsissutip eqqortumik allannissaa uppernarsaatinillu tulluartunik eqqartuussisunut saqqummiussaqarnissat pingaaruteqarpoq.

Akigititat 

Suliani ilaqutariinnermut tunngasuni eqqartuussummik suliareqqitassanngortitsinermi eqqartuussivimmut akitsuummik akiliissanngilatit.

Suliareqqitassanngortitsissut nassiuguk 

Suliami ilaqutariinnermut tunngasumi suliareqqitassanngortitsissut nassiussinnaavaat internetikkut immersugassaq atorlugu.

Tuugassaq sungaartoq, allakkat uku qulaatungaanniittoq, ”Suliami ilaqutariinnermut tunngasumi suliareqqitassanngortitsissut” toorlugu immersugassaq takusinnaavat. Immersugassaq immersulerukku NemID atussavat.

Immersugassaq iserfigigukku immersuinissannik ilitsersorneqassaatit

Suliareqqitassanngortitsissummut ilanngullugit nassiutissavatit:

  • Eqqartuussisoqarfiup imal. Kalaallit Nunaanni Eqqartuussiviup eqqartuussutaa aamma
  • ilanngussat allat, eqqartuussisoqarfiup imal. Kalaallit Nunaanni Eqqartuussiviup suliamik suliaqarnerani saqqummiunneqarnikuunngitsut


Maluginiaruk
Ilanngussat, eqqartuussisoqarfiup imal. Kalaallit Nunaanni Eqqartuussiviup suliamik suliaqarnerani atorneqarsimasut, nassiutissanngilatit. Taakku Nunatta Eqqartuussisuuneqarfiata nammineq piniassavai.

Immersugassaq immersoreerukku aamma eqqartuussut ilanngussallu allat atorusutatit kakkiutereerukkit ”nassiuguk” tuussavat. Taava akissuteqaatit Nunatta Eqqartuussisuuneqarfianut nassiunneqassaaq.

Suliamik ingerlatseriaaseq 

Piareersaataasumik eqqartuussineq
Nunatta Eqqartuussisuuneqarfiata suliareqqitassanngortitsissut tigusimaleruniuk aallarnisaataasumik eqqartuussinermut illuatungerisallu aggersassavaasi.

Tamanna piareersaataasumik eqqartuussinermik taaneqartarpoq.

Piareersaataasumik eqqartuussinermi makku paasinarsarneqassapput:

  • Illuatungeriit suliaq qanoq inerneqartikkusunneraat (piumasaqaatit)
  • Illuatungeriit isumaqatigiissinnaanersut
  • Paasissutissanik allanik piniarnissaq pisariaqarnersoq
  • Qaqugu inaarutaasumik eqqartuussisoqassanersoq
  • Inaarutaasumik eqqartuussinermi videokkut peqataasoqassanersoq
  • Illuatungeriit apeqqutigisinnaasaat


Illuatungerisat allakkatigut akissuteqarnissaminut piareersaataasumik eqqartuussisoqartinnagu periarfissinneqassaaq.

Piareersaataasumik eqqartuussinermi immikkut pingaaruteqarpoq paasiniassallugu angajoqqaat isumaqatigiissinnaanersut, suliami ilanngussanik allanik piniartoqassanersoq aamma suliaq qaqugu inaarutaasumik eqqartuussutigineqassanersoq.

Ilanngussanik allanik piniartoqassappat kiap taakku piniassanerai aamma isumaqatigiissutigineqassaaq.

Angajoqqaat meeqqat qanoq inneri pillugit piareersaataasumik eqqartuussinermi nassuiaateqassanngillat. Aatsaat inaarutaasumik eqqartuussisoqarnerani nassuiaateqartoqassaaq.

Angajoqqaat isumaqatigiippata
Angajoqqaat suliami suliareqqitassanngortinneqartumi akerleriissutaasut eqqartuussuteqartoqartinnagu isumaqatigiissutigippatigit Nunatta Eqqartuussisuuneqarfiata suliaq inaarsassavaa.

Eqqartuussutissamik isumaqatigiinniuteqarneq
Angajoqqaat isumaqatigiissinnaanngikkunik, piareersaataasumik eqqartuussineq pissaaq, angajoqqaallu eqqartuussutissamik isumaqatigiinniuteqarnermi nassuiaateqaqqinnissaminnut periarfissaqassapput.

Ilanngussat suliap siullermik suliarineqarnerani saqqummiunneqarsimasut Nunatta Eqqartuussisuuneqarfiata pigivai, taamaattumillu siornatigut nassuiaataasimasut ilisimavai.

Eqqartuussummik isumaqatigiinniuteqarnermi salliutillugit saqqummiunneqartussaapput ilanngussat nutaat kiisalu eqqartuussisoqarfiup imal. Kalaallit Nunaanni Eqqartuussiviup eqqartuussuteqarnerata kingorna qanoq pisoqarsimanera pillugu paasissutissat.

Eqqartuussutissamik isumaqatigiinniuteqarneq – qaqugu
Eqqartuussisoqarfik eqqartuussummik suliareqqitassanngortinneqartumik eqqartuussuteqartuussimappat nunap eqqartuussisuunera tullersortaaluunniit suliareqqitassanngortitsinermi eqqartuussuteqartuussaaq.

Kalaallit Nunaanni Eqqartuussivik eqqartuussummik suliareqqitassanngortitamik eqqartuussuteqartuusimappat nunap eqqartuussisuunera eqqartuussisuunerillu marluk Danmarkimeersut eqqartuussisuussapput.

Eqqartuussisuuneqarfik sulianik taamaattunik suliaqarnissamut ukiut tamaasa marloriarluni piffissaliisarpoq.
Suliaq eqqartuussutigineqarnissaminut piareerpat angajoqqaat isumaqatigiinniuteqarnissamut periarfissaq siullerpaaq pillugu ilisimatinneqassapput.

Eqqartuussutissamik isumaqatigiinniuteqarnissamut piareersarnermiit isumaqatigiinniuteqavinnissamut qaammatit pingasuniit arfinilinnut ingerlakkajuttarput.

Nunatta Eqqartuussisuuneqarfiata eqqartuussutaa
Nunatta Eqqartuussisuuneqarfiata eqqartuussutini allanneqareeraangat aatsaat nalunaarutigisarpaa. Taamaattumik eqqartuussut aatsaat allanneqareerpat Nunatta Eqqartuussisuuneqarfiata aalajangiineranik angajoqqaat paasitinneqassapput.

Eqqartuussutissamik isumaqatigiinniuteqarnerup naalernerani angajoqqaat paasitinneqassapput eqqartuussut qaqugu nassiunneqassasoq.

Eqqartuussut amerlanertigut nassiunneqartarpoq isumaqatigiinniuteqarnerup kingorna sap. akunnerata ataatsip ingerlanerani.

Allannguutit 

Eqqartuussut nalunaarutigineqareeraangat eqqartuussiviup eqqartuussuteqartuusup tunngavilersuut inerniliinerlu allanngortissinnaanngilai. Eqqartuussut taamaallaat eqqartuussivimmit qulliunerusumit allanngortinneqarsinnaavoq.

Eqqartuussummi kukkulluni allattoqarsimappat eqqartuussiviup eqqartuussuteqartup kukkuneq paasineqarniariarpat iluarsissavaa.

Piffissaliussat 

Suliareqqitassanngortitsissutit eqqartuussisoqarfiup imal. Kalaallit Nunaanni Eqqartuussiviup eqqartuussuteqarneraniit sap. akunneri arfineq-pingasut qaangiutsinnagit Nunatta Eqqartuussisuuneqarfiata tigoreersimassavaa. Eqqartuussutip ullua eqqartuussummi allaqqasarpoq.

Suliareqqitassanngortitsissut piffissaliussaq qaangiutereersoq tiguneqarpat Nunatta Eqqartuussisuuneqarfiata itigartitsissutigissavaa, aatsaallu akuerisinaavaa suliareqqitassanngortitsissut pissutissaqavillutit piffissaliussap iluani tunniussinnaasimanngikkukku.

Piffissaliussaq qaangiutereersoq suliareqqitassanngortitsinissamut akuerineqarneq
Suliareqqitassanngortitsinissamut akuerisaanissaq piffissaliussap qaangiutereernerani qinnuteqaatigigukku suliareqqitassanngortitsissummik piffissaliussap iluani tunniussaqarsinnaasimannginnernut pissutissaalluartoq ilisimatitsissutigissavat.

Piffissaliussap qaangiutereernerani suliareqqitassanngortitsisinnaasimannginnermut pissutaasinnaasut tamaasa allaaserinissaat ajornarpoq, kisianni assersuutigalugu akuerineqarsinnaavutit napparsimmavimmi uninngallutit ilisimajunnaaqqasimanerit pissutigalugu piffissaliussaq eqqortissinnaasimanngikkukku.

Piffissaliussaq puigorsimagukku imaluunniit suliassat allat ulapputigisimagukkit piffissaliussap qaangiutereernerani suliareqqitassanngortitsinissamut akuerisaanissat ilimagissanngilat.

Suliaq Nunatta Eqqartuussisuuneqarfiani aallartinneqarpat pappiaqqanik tunniussinissamut piffissaliisoqassaaq. Aamma Nunatta Eqqartuussisuuneqarfiata qaqugu eqqartuussisoqartassasoq aalajangersassavaa.

Suliareqqitassanngortitsinermik itigartitsineq
Piffissaliussat eqqortinngikkukkit imaluunniit eqqartuussinernut takkutinngitsooruit Nunatta Eqqartuussisuuneqarfiata suliareqqitassanngortitsinerit itigartitsissutigisinnaavaa.

Suliareqqitassanngortitsinerit itigartitsissutigineqarpat Nunatta Eqqartuussisuuneqarfiata suliaq suliareqqitassanngortitaq unitsissavaa.

Kalaallit Nunaanni Eqqartuussiviup eqqartuussutaanik allanngortitsinissamik illuatungerisat noqqaassuteqarsimappat tamanna Nunatta Eqqartuussisuuneqarfiata isummerfigissavaa, illilluunniit suliareqqitassanngortitsinerit itigartitsissutigineqarsimagaluarpat.

Maalaaruteqarneq 

Nunatta Eqqartuussisuuneqarfiata eqqartuussutai taamaallaat Ingerlatitseqqiinissamik Aalajangiisartut akuersissuteqarnerisigut Eqqartuussiviit Qullersaannut suliareqqitassanngortinneqarsinnaapput. Aatsaat suliaq tunngavimmigut pingaaruteqarpat Ingerlatitseqqiinissamik Aalajangiisartut akuersissuteqartarput.

Suliaq tunngavimmigut pingaaruteqarsinnaavoq:

  • apeqqut Eqqartuussiviit Qullersaata siornatigut suliarinikuunngisaanut tunngappat, aamma
  • aalajangiineq allanut, suliami illuatungeriinnuunnaanngitsoq, pingaaruteqarsinnaappat


Nunatta Eqqartuussisuuneqarfiata eqqartuussutaa Eqqartuussiviit Qullersaannut ingerlatikkusukkukku qinnuteqaatit uunga nassiutissavat: Nunatta Eqqartuussisuuneqarfia, postboks 1040, 3900 Nuuk imaluunniit Procesbevillingsnævnet Store Kongensgade 1-3, 2.,
1264 København K

Nunatta Eqqartuussisuuneqarfiata eqqartuussutaanik Eqqartuussiviit Qullersaannut suliareqqitassanngortitsinissaq pillugu akuersissuteqarnissamik qinnuteqaatit Nunatta Eqqartuussisuuneqarfianit imaluunniit Ingerlatitseqqiinissamik Aalajangiisartunit kingusinnerpaamik tiguneqareersimassaaq Nunatta Eqqartuussisuuneqarfiata eqqartuussuteqarneraniit sap. akunneri arfineq-pingasut qaangiunneranni. Qanga eqqartuussuteqarsimanera Nunatta Eqqartuussisuuneqarfiani eqqartuussutaani allaqqasarpoq.

Ingerlatitseqqiinissamik Aalajangiisartut nittartagaat takuuk (qupperneq nutaaq)

Inatsisit 

Aamma atuarsinnaasatit

Nunatta Eqqartuussisuuneqarfia
Jens Kreutzmannip Aqq. 5
3900 Nuuk

Oqarasuaat: 36 39 00
E-mail: post.landsret@domstol.gl
Nittartagaq: www.domstol.gl
Ikiu: www.ikiu.gl
Advokatnøglen: www.advokatnoeglen.dk
Ingerlatitseqqiinissamik Aalajangiisartut: www.domstol.dk/procesbevillingsnaevnet/