Namminersorlutik Oqartussat najugaqarfinni radio-qarfinnut tv-eqarfinnullu tapiissutaat – Nalinginnaasumik paasissutissiineq

Namminersorlutik Oqartussat najugaqarfinni radio-qarfinnut tv-eqarfinnullu tapiissutaat – Nalinginnaasumik paasissutissiineq 

Najugaqarfigisami radio-qarfiit tv-eqarfiillu inunnik akuunerulersitsisarnerat aamma kulturikkut naleqarnerat pissutigalugu atajuarnissaat Namminersorlutik Oqartussat soqutigisaraat. Taamaammat Namminersorlutik Oqartussat tapiissuteqarnermi aaqqissuussinernik sisamanik pilersitsisimavoq:

  • Najugaqarfigisami radio-qarfiit tv-eqarfiillu kattuffiata (STTK-ip) ingerlanneqarneranut suleqatigiiffimmut tapiissutit
  • Najugaqarfigisami radio-qarfiit tv-eqarfiillu sulisuinik pikkorissaanernut tapiissutit
  • Najugaqarfigisami radio-qarfiit tv-eqarfiillu ingerlanneqarnerannut tunngaviusumik tapiissutit
  • Najugaqarfigisami tv-eqarfiit aallakaatitassiaannut tapiissutit


STTK-ip ingerlanneqarneranut suleqatigiiffimmut tapiissutit Namminersorlutik Oqartussanit toqqaannartumik STTK-mut atugassiissutigineqartarput. Taamaattumik najugaqarfigisami radio-qarfiit tv-eqarfiillu suleqatigiiffimmut tapiissutinik qinnuteqarsinnaanngillat.

Pikkorissarnernut tapiissutit najugaqarfigisami radio-qarfiit tv-eqarfiillu sulisuinik pikkorissartitsinernut atorneqartussat Namminersorlutik Oqartussanit STTK-mut toqqaannartumik atugassiissutigineqartarput. Taamaammat najugaqarfigisami radio-qarfiit tv-eqarfiillu pikkorissartitsinernut tapiissutinik qinnuteqarsinnaanngillat.

Tunngaviusumik tapiissutit najugaqarfigisami radio-qarfinnit tv-eqarfinniillu STTK-mut qinnutigineqarsinnaapput. Tapiissutit najugaqarfigisami radio-qarfiit tv-eqarfiillu ingerlanneqarnerannut atatillugu tunniunneqartarput.

Tunngaviusumik tapiissutit qanoq qinnuteqaatigineqartarnerat allaaserisat attuumassutilinni annertunerusumik atuarsinnaavat.

Aallakaatitassiornermut tapiissutit najugaqarfigisami tv-eqarfinnit Namminersorlutik Oqartussanut toqqaannartumik qinnutigineqarsinnaapput. Aallakaatitassianut nammineq suliarisanut, aaqqissuuteriikkanut aamma qaammatini kingullerni pingasuni siullermeersumik aallakaatinneqarsimasunut tapiissuteqarfigineqarnissaq qinnutigineqarsinnaavoq.

Aallakaatitassiornermut tapiissutit qanoq qinnutigineqartarnerat aallaaserisat attuumassutilinni annertunerusumik atuarsinnaavat.


Malugiuk
Najugaqarfigisami radio-qarfimmik tv-eqarfimmilluunniit pilersitsiniaruit, akuersissutit marluk piumasaqaataammata eqqumaffigissavat. Aallakaatitsisinnaanermut akuersissut aamma maligaasat atorneqartussat pillugit akuersissut. Allaaserisat attuumassutilinni annertunerusumik atuagaqarsinnaavutit.

Nutaamik radio-qarfimmik tv-eqarfimmilluunniit aallartitsinissamut tapiiffigineqarnissamik Namminersorlutik Oqartussanut qinnuteqarsinnaanngilatit.

Allaaserisat attuumassutillit

Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl