Ingerlatsinermut tapiissutit

Paasissutissat nalinginnnaasut 

Naalakkersuisut nalinginnaasumik nuna tamakkerlugu tusagassiutinut naqitanut inuiaqatigiinnut paasissutissanik siammarterinerup, kikkut tamat oqallinnerisa aamma tugassiuutini tamatiguussutsip siuarsarneqarnissaannik siunertaqartunut ukiumut tunisassiornermut ingerlatsinermullu tapiissuteqartarput.

Ingerlatsinermut tapiissutit assersuutigalugu aviisinut atuagassianullu tunngavissilluarsimasunut sammitinneqarput, tassa imaappoq tusagassiuutit papilissatigut saqqummersinneqartartunut.

 

Piumasaqaatit 

Tapiiffigineqassagaanni piumasaqaataapput:

  1. tusagassiorfik Kalaallit Nunaanni angerlarsimaffeqassaaq,
  2. tusagassiorfik piffissami tapiiffigineqarfimmi tamarmi akisussaasumik aaqqissuisoqassaaq,
  3. ukiumi qinnuteqarfiusumi ukiorluunniit qinnuteqarfik sioqqullugu suliffeqarfik qinnuteqartup aallartissimanngippagu tusagassiorfik akisussaalluni aaqqissuisoq peqatigalugu sivikinnerpaamik ukioq tamaat suliffiusunik pingasunik katillugit tiimeqartunik aaqqissuussisartunik sulisoqassaaq,
    (inuit pingasut ukiumi ataatsimi sulinerattut sivisutigisoq imatut paasineqassaaq, ukiumut sulinerit amerlaqataannik naatsorsuinerni sulisut akissarsiallit ukiup siuliani sulinerat ulloq naallugu sulinertut allanngortillugu. Ukiumut sulinerit naatsorsorneqarnerat ukioq naallugu naatsorsorneqassapput aamma ukiup ilaani piffissami aalajangersimasumi sulisut amerlassusii pinnagit.
    Inuup ataatsip ukiumut suliarisinnaasai: Sulinerup sivisussusia inuup aalangersimasumik atorfillip ukioq naallugu nalinginnaasumik suliffissaatut aalajangersagaq / isumaqatigiissut. Ukioq naallugu qaammatisiutit nalunaaquttap akunneranik 2080-inik sivisussuseqakkajuttarpoq. Ullup ilaannaa atorfillit ukioq naallugu sulinerminni ulloq naallugu sulisup nalinginnaasumik suliffissai pillugit aalajangersakkat / isumaqatigiissutit ilagaat),
  4. saqqummersitat politikikkut, inuiaqatigiinnik kulturimillu sammisaqarfiunerusunik tusagassiortut namminneq suliarisaannik tusagassianik imaqassapput, tassani takoqqusaarutit ilanngunnagit imarisaata ikinnerpaamik affai sammisaqarfiit assigiinngiiaartut pillugit ilanngutassianik aamma nutaarsiassanik oqallisigineqartunik sammisaqarluni aaqqissuisuneersunik tusagassianik imaqassapput,
  5. inuussutissarsiortut sulianilluunniit suliarinnittartut, sulisut, sulisitsisut inuussutissarsiutilluunniit immikkoortuisa kattuffii, politikikkut partiit sulisoqarfinniluunniit assigiinngitsuni sulisut kisiisa saaffigiinnarnagit atuisunut assigiinngiiaartunut saqqummersitat saaffiginnittuussapput, aamma
  6. saqqummersitat minnerpaamik kalaallisut allassimassapput.

Qinnuteqaatit piumasaqaatit naammassisassaat aamma aajuku:
  • Tusagassiuut naqitanngorlugu saqqummersinneqassaaq
  • Tusagassiuut qaammammut ikinnerpaamik ataasiartumik saqqummertassaaq
  • Tusagassiuut nuna tamakkerlugu saqqummertassaaq

 

Qinnuteqarneq 

Ingerlatsinermut tapiissutinik qinnuteqaateqarniaruit qinnuteqarnissamut immersuiffissamik immersuissaatit. Matuma qulaani innersuussaq takusinnaavat.

Qinnuteqaatinik fax aqqutigalugu nassiussisoqarsinnaanngilaq.

NemID-mik peqaruit
NemID-mik peqaruit Kulturimut aningaasanik internetikkut qinnuteqaateqarsinnaavutit.

NemID-mik peqanngikkuit
NemID-mik peqanngikkuit, qinnuteqaammut immersugassaq immersoriarlugu allanik papiaraatinnik ilaasariaqartitannik ilallugu allakkatigut uunga nassiutissavat: ikin@nanoq.gl

Qinnuteqaatissannut piumasaqaatit paasilluarusukkukkit kulturimut tunngasunut siunnersorti attavigisinnaavat, Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoqarfimmut, uunga sianerlutit (+299) 34 57 41 imaluunniit emailimut: ikin@nanoq.gl

 

Suleriaatsit 

  1. Allatseqarfimmiut suliniummut tapiissutinik qinnuteqaammik tigusaqarput
  2. Allatseqarfimmi qinnuteqaat uppernarsaatinik eqqortunik imaqarnersoq misissorneqarpoq
  3. Allatseqarfimmi qinnuteqaat inatsisitigut piumasaqaatinik naammassinninnersoq misissorneqarpoq
  4. Allatseqarfimmit inaarutaasumik suliarinninnissamut aalajangiinissamullu inassuteqaateqartoqarpoq
  5. Qinnuteqaat Naalakkersuisunit aalajangiiffigineqarpoq

 

Naatsorsuisussaatitaaneq 

Tapiiffigineqarnissamik akuerineqarsimaguit naatsorsuusiortussaatitaavutit taakkunanilu tapiissutit siunertamut atorneqarsimanerat nalunaarsortussaavat. Ima pisoqarsimappat tapiissutisiarisimasatit tamakkiisumik naafferarlugilluunniit utertissavatit:

  • sinneqartooruteqarputit imaluunniit
  • aningaasat siunertamut atunngitsoorpatit

150.000 kr-inik tapiissutisisoqarpat kukkunersiuisumik nalunaarsorsimasumik atuisoqassaaq.

 

Piffissaliussat 

Qaammatisiutit ukiuani qinnuteqarfiusumi. Ingerlatsinermut tapiiffigineqarnissamut qinnuteqaat piffissami 14. novemberimiit 1. december ilanngullugu ukiumi qaammatisiutini qinnuteqaammi tunngatinneqartumi (ukioq tapiissuteqarfiusoq).

 

Naammagittaalliorneq 

Qinnuteqarfigisavit aalajangersimanerat eqqorsorinngikkukku taakkununnga naammagittaalliutigisinnaanngilat, naammagittaalliuuteqassaguilli taamaallaat eqqartuussivik aqqutigisinnaavat.