Sunngiffimmi kapisilinniarneq

Paasissutissat nalinginnaasut 

Nammineq atugassannik kapisilinniarnissaq kissaatigigukku akuersissuteqassaatit pisatillu Kalaallit Nunaanni Aalisarsinnaanermik Akuersissutinik Nakkutilliisoqarfimmut (KANUAANA-mut) nalunaarutigissallugit. Ukiup siuliani pisatit pillugit nalunaaruteqarsimanngikkuit sunngiffimmi akuersissut atulersinneqarsinnaanngilaq.

Alaatsinaassavat kapisilinniarnermut piffissaq aalisarfiusussaq eqqortinneqartussaq atuummat. Piffissaq aalisarfiusussaq ukiut tamaasa Naalakkersuisunit nalunaarutigineqartarpoq.

 

Piumasaqaatit 

  • Sunngiffinni kapisilinniarnissamut akuersissummik peqassaatit.
  • Danmarkimi innuttaasutut Kalaallit Nunaanni aalajangersimasumik najugaqassaatit.
  • Naalagaaffinni nunani allani innuttaaguit aalajangersimasumik Kalaallit Nunaanni najugaqassaatit aamma ukiuni marlunni ataqatigiissumik najugaqarsimassallutit.
  • Ukiup siuliani kapisilinniarnermut akuersissuteqarsimaguit akuersissutip atulersinnissaanut pisat pillugit nalunaarusiaq Kalaallit Nunaanni Aalisarsinnaanermik Akuersissutinik Nakkutilliisoqarfimmut (KANUAANA-mut) nassiussimassavat. Tamanna aamma pisaqanngitsoorsimanermut atuuppoq.
  • Qassutinik, oqummersamik qissattaammilluunniit pisat tamarmik KANUAANA-mut nalunaarutigineqassapput. Akuersissutaateqarlutit Kapisilinniarnerup nalaani pisaqarsimanngikkuit aalisariarsimanngikkuilluunniit suli nalunaartussaatitaavutit – taannalu taaneqartarpoq 0-mik nalunaarut.
  • Kapisilinniarnerup naaneraniit ullut 30-it qaangiutsinnagit nalunaaruteqarsimanngikkuit ukiup tulliani akuersissummik pisinnaanngilatit.

 

Aalisarnermi atorneqartussatut piumasaqaatit 

  • Uku atorlugit kapisilinniarsinnaavutit:
    • Qissattaat
    • Qassutit imaluunniit
    • Oqummersaq
  • Qassutit kapisilinniutit ataatsit 2000-inik nigartallit, nigartaa tasillugu minnerpaamik 140 mm-iusut kisiisa atorsinnaavatit.
  • Qassutit kapisilinniutit piginnittut aqqanik nalunaaqutserneqarsimassapput. Nalunaaqutsiinermi atorneqartoq imermi allanngujaatsuussaaq.
  • Silap pissusaata taamaattoqartissinnaappagu qassutit kapisilinniutit akuttunngitsumik akulikitsumillu qassusiarfigineqartassapput, pisat atorluarneqarsinnaanissaat ajornerulertussaajunnaarlugit.

 

Aalisarfissatut piffissaliussaq 

Eqqumaffigissavat kapisilinnik aalisarnermi piffissaliussaq malinneqartussaammat. Ukiut tamaasa Naalakkersuisunit aalisarfissatut piffissaliussaq nalunaarutigineqartarpoq.

 

Qinnuteqarneq 

Sunngiffimmi kapisilinniarnissamut akuersissummik qinnuteqarusukkuit illit kommuninnut saaffiginnissaatit. Ukiup siuliani pisanik nalunaaruteqarsimanngikkuit kapisilinniarnissamut akuersissummik tunineqarsinnaanngilatit.

Akuersissut ukiumut pisassiiffiusumut ataatsimut atuuppoq taamaattumillu ukiut tamaasa akuersissummik nutaamik qinnuteqartassaatit. Ukioq pisassiiffiusoq januaarip aallaqqaataaniit decembarip 31-ata tungaanut atuuttarpoq.

Arajutsinaveersaassavalli ullormit akuersissummi allassimasumiit ukiup pisassiiffiusup naanissaanut taamaallaat atuuttarmat.

 

Qinnuteqaatinut nassiussanut suleriaaseq 

Ukiup siuliani akuersissuteqarsimaguit ingerlaannartumik kommunip akuersissummik tunisinnaavaatit, ukiup siuliani aalisarnerit pillugit nalunaaruteqarsimaguit. Nalunaaruteqartarsimanngikkuit akuersissummik tunineqarsinnaanngilatit.

Kapisilinniarnissamut akuersissummik siullermeertumik qinnuteqassaguit kommuni peqatigalugu qinnuteqaammik immersuissaatit Aalisarnermut, Piniarnermut Nunalerinermullu Naalakkersuisoqarfimmi Akuersissutinut immikkoortortaqarfimmullu nassiullugu tassani qinnuteqaatit suliarineqassaaq akuersissummillu tunineqarnissannut piumasaqaatinik naammassinninnersutit misissorneqarluni.

Tamatuma kingorna akuersissut imaluunniit itigartitsineq tunngavilersorneqarsimasoq tigussavat.

Qinnuteqaatit suliarineri amerlanertigut sapaatip akunneranik sivisussuseqartarput.

 

Nalunaaruteqarneq 

Kapisilittat tamaasa imaluunniit oqummersamik qissattaammilluunniit kapisilereernerit tamaasa, Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nalunaarutigineqassapput, aamma pisaqarsimanngikkaluaraanniluunniit tamannalu inuussutissarsiutigalugu sunngiffimmilu aalisartunut atuuppoq.

Piffissami aalisarfiusumi pisaqarsimanngikkuit aalisariarsimanngikkuilluunniit akuersissutaateqarlutillu, 0-mik nalunaaruteqassaatit – tassa pisaqanngitsoorsimasutut nalunaaruteqarneq.

Aalisarnerup naammassineqarneraniit kingusinnerpaamik ullut 30-t kingorna nalunaaruteqarsimanngikkuit ukiup tulliani akuersissummik tunineqarsinnaanngilatit.

Una tooruk kapisilittatillu uani nalunaarutigalugit

 

Maalaaruteqarneq 

Oqartussat aalajangeeriaasiat aallaaviatigut naammagittaalliutigisinnaanngilat. Qinnuteqaatilli akuerineqassanngikkaluarpat tunngavilersuummik tunineqarumaarputit. Aalajangiineq kukkusumik tunngavilerneqarsimasorigukku imaluunniit paatsoortoqarsimasoq Aalisarnermut, Piniarnermut Nunalerinermullu Naalakkersuisoqarfimmut naammagittaalliorsinnaavutit, taassumalu ilinnut suliaq nalileqqitassatut ingerlassinnaavaa. Qinnuteqaativit akuerineqannginneranut allakkiaq tigugukku piaarnerpaamik naammagittaalliuutit nassiutissavat.

Naammagittaalliuutit allakkatiguussaaq aamma sooq sunalu pillugu naammagittaalliuuteqarnerlutit allassavat. Eqqaamajuk naammagittaalliuutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.

Aalisarnermut, Piniarnermut Nunalerinermullu Naalakkersuisoqarfiup naammagittaalliuutit nalilersussavaa suliarlu ilinnut tunngasoq ingerlanneqareerpat attavigineqarumaarputit.

 

Aamma atuarsinnaasatit

Aalisarnermut, Piniarnermut Nunalerinermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.apnn.gl