Eqalunniartarneq

Eqalunniartarneq 

Nalinginnaasumik paasissutissiineq 

Eqalunniarneq (Salvelinus alpinus) qangaanilli ileqquuvoq aamma isumalluut taanna ulluinnarni nerisanut tapertatut pingaarnertut atorneqarsimalluni. Eqalunniarneq qangaanilli aasaanerani piniariarnermi pingaarutilinnut ilaasimavoq aamma taamaalilluni kuuit ilaat kinguaariit arlallit ingerlanerini ilaqutariinnit aalajangersimasunit atorneqartarsimapput. Ukiuni kingullerni sukisaarsaatigalugu aalisarnermi eqalunniarnerup soqutigineqarnera qaffakkiartorsimavoq.

Eqaluk aalisagaavoq niuerutigineqarneq ajortoq aamma taassuminnga aalisarneq, inunnut Kalaallit Nunaanni aalajangersimasumik najugaqartunut tamanut ammavoq. Inuussutissarsiutigalugu piniarnermut allagartaqaruit kalaalimineerniarfimmut eqalunnik tuniniaasinnaavutit.

Eqalunniarneq pillugu illit kommunerisat immikkut ittunik malittarisassaqarsinnaavoq. Assersuu¬ti¬galugu kommunit ataasiakkaat kuunnut eqqissisimatitanut tunngatillugu immikkut ittunik peqqus¬su¬teqartarpoq, kiisalu aalisartup atortui sorliit atorneqassanersut, taakkununnga ilaallutik ningittakkat pullatillu. Eqalunniannginnerni tamakku peqqussutit paasiniaaffigeqqaassallugit pisussaatitaavutit.

Eqaluit nikittarneri 

Eqalunniarnerup annersaa juulimi aamma aggustimi ingerlanneqartarpoq. Upernaakkut sikup aputillu aareernerisa kingornatigut eqaluit kuunnit tatsinillu ukiiffigisimasaminnit sisusarput. Maajimi juunimilu sisugajunnerusarput taamaattumillu piffissap eqalunniarfiusussap aallartinnerani aatsaat eqalunniarneq ingerlanneqarnerulersarpoq imaani tarajuusumi kuuit akuisa eqqaanni. Aggustimi eqaluit amerlanersaat kuunniilersarput septembarimilu suffisarfinnut apuussimalersarlutik.

Piumasaqaatit 

Eqalunniarneq taamaallaat makku atorlugit ingerlanneqassaaq:
  • Aliikkutaralugu aalisarnermi qarsorsat
  • Qalut naatsunnguamik ipullit qassutillu minnerpaamik 100 mm-iusut

Qassusersornermi aammattaaq makku atuutsinneqassapput:
  • Qassutit 30 meter-it sinnerlugit takissuseqassanngillat
  • Qassutit piginnittup aqqanik, angallatip aqqanik angallatillu normuanik nalunaaqutsersimassapput
  • Qassutit ningissimatillugit nakkutigineqartuassapput. Eqalunniarfik qimanneqarpat piffissaq apeqqutaatinnagu piginnittup qassutini qaqissavai

Qassusersornermi malittarisassat
Qassusersorluni eqalunniarneq taamaallaat akuerisaavoq piffissami juunip 15-iannit septembarip 25-at ilanngullugu.

Tamakku saniatigut eqalunniarnermi malittarisassat ataani allassimasut malinneqassapput:
  • Kuunni taakkulu tasinngortaanni qassusersorluni eqalunniarnerit tamarmik inerteqqutaapput
  • Tatsini eqalunniarnermi kuuit tatsimut akuaniit kuuillu aariaanniit 100 meter-init qaninnerusumut qassuserneq inerteqqutaavoq
  • Tatsini qassusersornermi qassutit tatsip sinaaniit akimut ikertussusiata aggornerisa pingajorarterutaat sinnerlugu takissuseqassanngillat
  • Kuup akiani illugiinnik kuuk 150 meter-init qaninnerullugu qassusersorneq inerteqqutaavoq
  • Qassutit timaatungaat ulinnerani immap angusagaanut attuumasunngorlugit nivinngarneqartassapput
  • Qassutit imartap ikertussusiata pingajorarterutaa sinnerlugu takissuseqassanngillat
  • Qassutit narlusuumik nunamiit avammoorlugit nivinngarneqassapput. Amerlanaarlugit pisaqarnissaq siunertaralugu qassutit allatut ilusilerlugit nivinngarnissaat inerteqqutaavoq
  • Qassutit eqalunniutit qassutinut tullernut minnerpaamik 30 meter-inik akunnilerlugit nivinngarneqartassapput
  • Ujaqqanik sapusiat atorlugit eqalunniarsimagaanni eqalunniarfik qimatsinnagu saputit ingerlaarfilerlugit ammarneqassapput

Nakkutilliineq aamma misissuineq najukkami piniarnermik nakkutilliisunit, politiinit imaluunniit Naalakkersuisunit tamatumunnga piginnaatitaasunit ingerlanneqartassapput.

Takornariat 

Aliikkutaralugu aalisartartut tamarmik Kalaallit Nunaata avataani najugallit, Kalaallit Nunaanni aalisarsinnaanissaminnut aalisarnissamut akuersissummik atuuttumik peqassapput. Aalisarnissamut akuersissut qissattuummik, aalisaammik assassorluniluunniit aalisarnermut atortumik aalisarnissamut pisinnaatitsivoq. Takornarianut aliikkutaralugu aalisartartunut qassusersorneq inerteqqutaavoq.

Aalisarnissamut akuersissut pillugu annertunerusumik paasiniaaffigisinnaavat nittartakkami uani www.greenland.com.

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.naalakkersuisut.gl