EU-mit uppernarsaasigaaneq (certificering)

EU-mit uppernarsaasigaaneq (certificering) 

Aalisarsinnaanermut Akuersissutinik Nakkutilliisoqarfik (KANUAANA/GFLK) pisortat oqartussaaffigaat, qularnaassallugu aalisarneq maleruagassat naalakkersuinikkut aalajangiunneqartut malillugit ingerlanneqassasoq. Aalisarnermik nakkutilliinerup ilagaa, EU-mit uppernarsaasigaaneq.

EU-mit uppernarsaasigaanermi aalisakkanik tunisassiat, Kalaallit Nunaanniit EU-mut niuerutigineqartut, unioqqutitsinani aalisarneqarsimassasut aamma tunisassiat pissusissaatut nalunaarutigineqarsimanissaat qulakkeerneqartarpoq.

EU-mut aalisakkanik tunisassianik niueruteqaruit, uppernarsaat eqquutsittussaavat. Uppernarsaatit assigiinngitsut marluupput:

  • A-mik uppernarsaatit, angallatinut 12 meter-imit takinerusunut atuupput.
    Uppernarsaammi nalunaarneqarsimassapput, angallat, aalisarsinnaanermut akuersissut atorneqarsimasoq, aalisarnermi sumiiffik, ullut pisaqarfiusut aamma pisarisat
  • B-mik uppernarsaatit, angallatinut 12 meter-imit naannerusunut atuupput.
    Uppernarsaammi aalisakkat angallatinit minnernit pisarineqarsimasut allanneqarsimanerat nassuiaatigineqarput


Eqqaamajuk pisarisat pillugit paasissutissat tamatigut niuerutigisavit annertussusaannit aallaaveqartartussaammata.

Uppernarsaatit ilitsersuutillu uani pissarsiarisinnaavatit.

Kalaallit Nunaanni Aalisarsinnaanermut Akuersissutinik Nakkutilliisoqarfimmut uppernarsaatit pigisatit GFLK-certificates@nanoq.gl -imut nassiussinnaavatit akuerineqartussanngorlugit. Tamatuma kingorna pisisartumut aamma EU-mi killeqarfimmik nakkutilliisunut, niuerfigisat aqqutigalugu nassiussinnaavatit. Tamanna Aalborg-imi pigajunnerusarpoq.


Malugiuk
Pisisartuvit ilaat ataasiinnarluunniit, aalisakkanik unioqqutitsisumik pisarineqartunik, assersuutigalugu akuersissummik atuuttumik atuinani, KANUAANA-mit uppernarsaat pigisat itigartinneqarsinnaavoq. Uppernarsaammik akuerisamik peqanngikkaanni, EU-mi oqartussaasut eqqussinissaq akuerinavianngilaat. Taamak pisoqarpat, tunisassiat Kalaallit Nunaannut utertinneqarlutilluunniit aserorterneqassapput. Taamaammat avammut niuertutut qulakkeertussaavat, aalisarnermut tunisinermullu maleruagassat pisisartuvit malissammatigit.

Aalisarnermik nakkutilliinermi suleqatigiinnissamut pisussaaffeqarputit. Taamak iliunngikkuit mianersoqqussummik tunineqarsinnaavutit imaluunniit politiinut nalunaarutigineqarsinnaavutit akiligassinneqarlutillu.

Allaaserisat attuumassutillit

Kalaallit Nunaanni Aalisarsinnaanermut Akuersissutinik Nakkutilliisoqarfik (KANUAANA)
Indaleeqqap Aqq. 3
Postboks 501
3900 Nuuk

Oqarasuaat: (+299) 34 50 00
Fax: (+299) 34 63 60
E-mail: gflk@nanoq.gl
Nittartagaq: www.naalakkersuisut.gl