Atertaartitsineq kuisitsinerlu

Atertaartitsineq kuisitsinerlu 

Meeraq inunngorneranit kingusinnerpaamik ukiup ataatsip qaangiunnerani atserneqassaaq. Taamak marlutigut iliuuseqarsinnaavusi: Meeqqap atserneratigut imaluunniit kuisinneratigut.


Atertaartitsineq
Meerarsi atertaartikkumagussiuk najukkassinni oqaluffiup allaffianut saaffiginnissaasi. Meeraq atertaareerpat, ateqarnerminut uppernarsaammik pissaaq. Kikkut tamarmik qanorluunniit upperisaqaraluarunik meerartik oqaluffiup allaffiani atsertussaavaat.


Kuisitsineq
Meerarsi oqaluffimmi kuisikkumagussiuk, meeqqap kuisinnissaata ullulerneqarnissaa isumaqatigiissutigiumallugu najukkassinni oqaluffiup allaffianut saaffiginnissaasi. Kuisitsineq nalinginnaasumik (persuarsiornartumik) sapaammi naalagiarnermi ingerlanneqassaaq.

Meerarsi oqaluffimmi kuisippat, meeraq kuisinnermut uppernarsaammik pissaaq ilutigisaanillu kalaallit ilagiit oqaluffianni ilaasortanngussaaq.

Meerarsi oqaluffimmi kuisitsissinnaajumallugu, ikinnerpaamik arlarsi ataaseq ilagiinni ilaasortaasariaqarpoq.


Atertaartitsineq kuisitsinerlu
Meeqqap kuisittussaanera atertaartuussaaneraluunniit apeqqutaatinnagu, oqaluffiup allaffianut saaffiginnikkussi makku nassassavasi:

  • Ilissi kuisinnissinnut uppernarsaatissi imaluunniit ateqarnissinnut uppernarsaatissi nuutinneri
  • Katissimagussi ilissi katissimanissinnut uppernarsaatip nuutinnera
  • Katissimanngikkussi ataatassarsiuussinermi suliap nuutinnera. Najukkassinni politeeqarfimmi ataatassarsiuussineq pillugu suliaq immersussavarsi
  • Meeraq Danmark-imi imaluunniit palaseqarfimmi allami inunngorsimappat, meeqqap inunngornerani paasissutissat nuutinneri. Ilageeqarfimmi meeqqap inunngorfigisimasaani oqaluffiup allaffianit inunngornermi paasissutissat pissarsiarisinnaavasi


Aqqit akuerisaasut
Meeraq atermik akuerisaasumik taamaallaat atserneqarsinnaavoq. Ilaqutariinnermut aqutsisoqarfiup nittartagaani dansk-it aqqi akuerisaasut allassimaffiat nassaarisinnaavarsi. Oqaasileriffiup nittartagaani kalaallit aqqi akuerisaasut allattorsimaffiat nassaarisinnaavarsi.

Meeraq ataatsimik arlalinnilluunniit siuliaquteqassaaq.

Meeraq aamma atermi ilassaanik ataatsimik arlalinnilluunniit atertaarsinnaavoq. Atit ilaat ataataasup anaanaasulluunniit atiisa ilaanik ilaneqarsinnaavoq imaluunniit ateq meeqqap kinguliaqutitaarisinnaasaa toqqarneqarsinnaalluni.

Angajoqqaat kinguliaqutaat meeqqap kinguliaqutitaarissavaa imaluunniit angajoqqaat assigiinngitsunik kinguliaquteqarpata angajoqqaat arlaata kinguliaqutaa kinguliaqutitaarissavaa.

Meeqqap angajoqqaarsiami kinguliaqutaat kinguliaqutitaarissappagu tamanna Kalaallit Nunaanni Naalagaaffiup Sinniisoqarfianut qinnuteqaatigineqassaaq.


Kuisinnermut imaluunniit ateqarnermut uppernarsaat nutaaq
Kuisinnermut imaluunniit ateqarnermut uppernarsaat katassimagukku, palaseqarfimmi kuisiffigisimasanni atertaarfigisimasanniluunniit, oqaluffiup allaffiani nutaamik inniminniisinnaavutit. Taakku nutaamik uppernarsaammik sanaatissavaatsit.

Allaaserisat attuumassutillit

Palaseqarfik