Oqaluffimmi ilisisarnerit

Nalinginnaasumik paasissutissiineq 

Kikkulluunniit Kalaallit Nunaanni najugallit najugaqarallartullu, qanorluunniit upperisaqaraluarunik Kalaallit Nunaanni ilisaanissamut pisinnaatitaaffeqarput. Taamaattoq palasip kristumiutut iliseriaaseq naapertorlugu ilisiguni ilisineq oqaluffik aqqutigalugu ilisineruvoq.

Toqusup allagartaa
Inuk toquppat, nakorsap toqusumik uppernarsaasuusup toqusup allagartaa suliarissavaa. Tamatuma kingorna toqusup allagartaa najugaqarfimmi palaseqarfimmut nassiutissavaa.

Toqusoq qanorluunniit upperisaqaraluarpat, palaseqarfiup toqusup allagartaa tigussavaa. Taanna tiguneqareerpat pisortat allat toqusoqarsimanera pillugu nalunaarfigineqassapput.

Ilisinerup piareersarneqarnera
Toqusimasoq oqaluffik aqqutigalugu ilisaarusulluni kissaateqarsimappat toqusimasup najugaqarfigisaani palaseqarfik attavigineqassaaq. Taava palasi peqatigalugu isumaqatigiissutigissavarsi ilisineq qaqugu qanorlu ingerlanneqassanersoq. Palasip oqaloqatiginerata nalaani isumaqatigiissutigissavarsi tussiutit sorliit ilisinermi atorneqassanersut. Najugaqarfigisassinnilu arlariinnik oqaluffeqarsimappat, oqaluffimmi sorlermi ilisaassanersoq aamma isumaqatigiissutigissavarsi.

Illerfissarsiutileqatigiit
Toqusimasoq najugaqarfimmini illerfissarsiutileqatigiinnut ilaasortaasimappat, peqatigiiffik taanna attavigineqassaaq. Illerfissarsiutileqatigiit ilaasortartik toquppat, ilisinermut aningaasartuutit isumagissavaat, tamanna qimagaasunut oqilisaataasarpoq ilisineq akisusinnaasarmat.

Malugiuk
Toqusimasoq upperisarsioqatigiinnut allanut ilaasortaasimappat, soorlu pinsesiortuni, taava taakkununnga saaffiginnissaatit ilisineq piareersarsinnaaqqullugu.

Oqaluffimmi ilisaasoqassappat toqusimasoq Ilagiinnut Kalaallinut ilaasortaasariaqarpoq.