Utoqqalinersiuteqalernissamik qinnuteqarit

Utoqqalinersiuteqalernissamik qinnuteqaat

Utoqqalinersiuteqalernissamik qinnuteqarit 

Nalinginnaasumik paasissutissiineq 

65-inik ukioqaleruit utoqqalinersiutinik pisartagaqalernissannut qinnuteqarnissannik periarfissaqalissaatit.

1. januar 2017 aallarnerfigalugu utoqqalinersiuteqalernissamut ukiorititat 66-inut qaffanneqassapput.
Immikkut pisoqartillugu qinnuteqartoqartillugulu kommunalbestyrelsi aalajangiisinnaavoq innuttaasunut, minnerpaamik ukiuni 35-ini timikkut tarnikkullu assoroornartumik sulisimasunut, utoqqalinersiuteqalernissamut ukiorititat aatsaat 66-inut qaffanneqarsinnaasut 1. januar 2017 aallarnerfigalugu.

1. januar 2021 aallarnerfigalugu utoqqalinersiuteqalernissamut ukiorititat 67-inut qaffanneqassapput.
Immikkut pisoqartillugu qinnuteqartoqartillugulu kommunalbestyrelsi aalajangiisinnaavoq innuttaasunut, minnerpaamik ukiuni 35-ini timikkut tarnikkullu assoroornartumik sulisimasunut, utoqqalinersiuteqalernissamut ukiorititat aatsaat 67-inut qaffanneqarsinnaasut 1. januar 2025 aallarnerfigalugu.

Utoqqalinersiutit kommunimi najugarisanni aqunneqarlutillu tunniunneqassapput.

Piumasaqaatit 

Utoqqalinersiuteqalerniaruit:
  • danskisut innuttaassuseqassaatit
  • Kalaallit Nunaanni aalajangersimasumik najugaqassaatit
  • 65-inik ukioqalereersimassaatit

Danskisut innuttaassuseqanngikkuit utoqqalinersiutisiassanik pissarsisalernissamut pisut ilaanni periarfissaqarpoq.

Annertunerusumik paasisaqarusukkuit najukkanni innuttaasunut sullissivimmut imaluunniit nunaqarfiup allaffianut saaffiginnissinnaavutit.

Utoqqalinersiutit annertussusaat 

Utoqqalinersiutit tunngaviusumik aningaasanik utoqqalinersiutinullu tapinik annertussuseqarput.

Tunngaviusumik aningaasat annertussusaat ukiumut kr. 59.900-it tikillugit annertussuseqarput.

Utoqqalinersiutinut tapit ukiumut kr. 74.300-t kisermaamut taavalu utoqqalinersiutilimmut aappalimmut ukiumut 41.300-t tikillugit annertussuseqarput.

Utoqqalinersiutitut isertitavit killigititaq aalajangersimasoq qaangerpagu tunngaviusumik aningaasat annertussusaat utoqqalinersiutinullu tapit annikillisinneqassapput:
  • Kisermaamut utoqqalinersiutinut tapit annikilliartortinneqartassapput nammineq isertitat 56.000 kr.-iniit 216.000 kr.-init tikillugit annertusiartornerat ilutigalugu, tamatumali kingorna tapisiaaruttoqassalluni.
  • Utoqqalinersiutinut tapit utoqqalinersiutilinnut aappariinnut, taakkua 83.000 kr.-iniit 220.667 kr.-init tikillugit saniatigut isertitaqarsimappata, tamatumali kingorna tapisiaaruttoqassalluni.

Malugiuk
Utoqqalinersiutinut tapit eqqarsaatigalugit taakkua aappariit pilersoqatigiinnissaannut attuumatinneqassapput.

Ukiup ingerlanerani isertitatit annertuumik ataavartumillu allannguuteqarpata, allannguinerup kingorna qaammatip aallaqqaataani atuutilersumik utoqqalinersiutitit allanngortinneqassapput.

Tapit allat 

Tunngaviusumik utoqqalinersiutit aningaasartaasa utoqqalinersiutinullu tapit saniatigut, inissisimanerit apeqqutaalluni, allanik aamma tapisisinnaavutit.

Meeqqanut tapit
Meeqqamut 18-it inorlugit ukiulimmut pilersuisussaatitaaguit, meeqqanut tapinik tunineqarsinnaavutit.

Meeraq ilinni najugaqarpat meeqqanut tapinik pisartagaqassaatit. Meeraq ilinni najugaqanngippat meeqqap najugaqarfianut pilersuisumut tapit tunniunneqartassapput.

Aningaasaqarnermut inatsimmi ukiumut nalinginnaasumik aalajangiiffigineqartartut qaqugukkulluunniit atuuttut malillugit meeqqanut tapit annertussuseqarput.

2016-imi meeqqanut tapit qaammammut 1.000 kr.-iupput.

Innarluuteqarnermut peqqissutsimullu tunngatillugu tapit, aningaasaqarnermut tapit aamma aningaasat nammineq atorsinnaasat malillugit tapit
Innarluuteqarnermut peqqissutsimullu tunngatillugu tapit, aningaasaqarnermut tapit aamma aningaasat nammineq atorsinnaasat malillugit tapit tunniunneqassapput nalilerneqaruit pisinnaatitaallutit.

Tapit pillugit pisinnaatitaanerlutillu paasisaqarnerorusukkuit, kommunerisat attavigisinnaavat.

Qinnuteqarneq 

Utoqqalinersiutinik qinnuteqarusukkuit qinnuteqarnissamut immersugassaq immersussavat.

Eqqaamallugu piffissaagallartillugu utoqqalinersiutinik qinnuteqarnissat.

NemID pigigukku
Nittartakkakkut sullissivik.gl aqqutigalugu imminut sullinniaruit NemID pigisariaqarpat. NemID netbankinnut atortakkat atorsinnaavat.

NemID pillugu sukumiinerusumik atuarit inniminniillutillu

Imminut sullinneq aallartiguk

NemID piginngikkukku
NemID piginngikkukku qinnuteqarnissamut immersuiffissaq immersussavat. Utoqqalinersiuteqalernissamut qinnuteqaat.

Utoqqalinersiuteqalernissamut qinnuteqaat aaguk

Immersuiffissaq immersoreerukku najukkanni innuttaasunut sullissivimmut imaluunniit nunaqarfiup allaffianut nassiutissavat tunniulluguluunniit.

Naammagittaalliorneq 

Utoqqalinersiutinik imaluunniit inuttut tapinik pisartagaqaruit – imaluunniit qinnuteqarsimaguit – kommunip imatut aalajangiinera naammagittaalliutigisinnaavat:
  • Utoqqalinersiutit tunniunneqarnerat aqunneqarnerallu
  • Utoqqalinersiuteqalernissamut itigartitaaneq
  • Inuttut tapinut itigartitaaneq
  • Aningaasat nammineq atorsinnaasat malillugit tapinut itigartitaaneq
  • Pisariaqartillugu ikiorsiissutinut tapiissutinik itigartitaaneq

Kommunip aalajangiinera isumaqatiginngikkukku Isumaginninnermi Naammagittaalliuteqartarfimmut naammagittaalliorsinnaavutit.

Isumaginninnermi Naammagittaalliuteqartarfimmut naammagittaalliorneq

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl