Pisortatigoortumik katinneq – Nalinginnaasumik paasissutissiineq

Pisortatigoortumik katinneq – Nalinginnaasumik paasissutissiineq 

  • Qaasuitsup Kommunia

    Qaasuitsup Kommuniani innuttaasutut katinniarussi, ilanngussat pisarisaqartut ilanngunnerisa saniatigut taamaallaat katinnermut uppernarsaat immersorneqassaaq, atsiorneqarluni tunniunneqarlunilu.

    Katinnermut uppernarsaat (Immersuiffissaq taamaallaat danskisut allassimavoq)

    Ilulissani innuttaasutut katinnerit ingerlanneqartut Qaasuitsup Kommuniata kommunalbestyrelsiata ataatsimiittarfiani nalinginnaasumik ingerlanneqartarput, allami katinnissaq kissaataasimanngippat.
    Katinneq assersuutigalugu pinngortitami iluliarsuit tunuliaqutaralugit imaluunniit angerlarsimaffimmi ingerlanneqarsinnaavoq.

    Kommunalbestyrelsip ataatsimiittarfiata avataani sumiiffimmi allami katinnissarsi kissaatigigussiuk, borgmesterip imaluunniit taassuma sinniisussaanik piffimmut angallannissaa isumagissavarsi.

Pisortatigoortumik katitsinneqarneq tassaavoq katinneq inummit oqartussaassuseqartumit ingerlanneqartoq. Tamanna pisarnermisut kommuniusarpoq. Pisortatigoortumik katitsinneqarneq aamma oqaluffimmi aappariit katitsinneqarsimasut inatsiseqarnikkut immikkoortinneqanngillat. Oqaluffimmi katinnissaminngarnit pisortatigoortumik katitsinneqarnissamik kissaateqarneq arlalinnik patsiseqarsinnaavoq. Assersuutigalugu aalajangersimasumik upperisamut ilaannginneq peqqutaasinnaavoq.


Piumasaqaatit
Katinniaraanni

  • 18-it inorlugit ukioqartoqassanngilaq
  • pisinnaatitaaffiagaasoqarsimassanngilaq
  • aamma katereersimasoqassanngilaq


Aapparisat imaluunniit tamassi 18-it inorlugit ukioqarussi, katitsinnasi akuersissummik pissarseqqaassaasi. Akuersissutit tulliuttunit pissarsiarineqassapput:

  • Ilissinnut angajoqqaatut oqartussaassuseqartumiit
  • Rigsombudsmand-i


Pisortatigoortumik katitsinneqarneq pitinnagu
Katitsigasi aappariilernissamut nalunaaruteqarneq/katinnermut uppernarsaat aamma immersugassaq katittussat immersussavasi.

Aappariilernissamut nalunaaruteqarneq/katinnermut uppernarsaat immersorneqarlunilu ullulerneqassaaq atsiorneqarlunilu. Aappariilernissamut nalunaaruteqarnermut/katinnermut uppernarsaammut aamma immersugassamut katittussat ilanngunneqassapput:

  • Inuttut normup uppernarsaataata nuutinnera
  • Kuisinnermut uppernarsaat
  • Inuttut atukkat (civilstand) pillugit paasissutissat allassimaffiat, inuit allattorsimaffianni pissarsiarineqarsinnaasut
  • Avinnermut uppernarsaat imaluunniit avinnissamik eqqartuussutip allassimaffiata nuutinnera (Arlarsi avissimappat imaluunniit marluullusi avissimagussi)
  • Siusinnerusukkut katissimasaq toqusimappat toquneranut uppernarsaat (nuleerneruguit imaluunniit uillarneruguit)


Katinnissarsi kissaatigigussiuk kingusinnerpaamik ullut 14-it sioqqullugit, aappariilernissamut nalunaaruteqarneq/katinnermut uppernarsaat, immersugassarlu katittussat ilanngussallu kommunimut nassiullugilluunniit tunniutissavasi.


Katinneq
Katinneq borgmester-imit, borgmester-ip tullersortaanit imaluunniit inummit allamit taama iliornissamut pisinnaatitaasumit ingerlanneqartarpoq. Katinneq nalinginnaasumik allaffimmi imaluunniit kommunalbestyrelse-p ataatsimiittarfiani ingerlanneqartarpoq. Kommunit ilaani assersuutigalugu pinngortitami imaluunniit ilissi angerlarsimaffissinni katinnissarsi pisinnaasarpoq.

Katinneq inunnik marlunnik uppernarsaasunik najuuffigineqartussaavoq, taakku aappariilernissamut nalunaaruteqarneq/katinnermut uppernarsaat atsiortussaavaat. Uppernarsaasussanik nammineerlusi peqataatitaqanngikussi, kommunip sulisuni peqataatissinnaavai.


Nunani allani imaluunniit kommunimi allami katinneq
Nunani allani imaluunniit kommunerisassi avataani kommunimi allami katinnissarsi kissaatigigussiuk, ilissi kommunerisassinnut misilinneqarnermik uppernarsaammik tunniussisussamut aappariilernissamut nalunaaruteqarneq/katinnermut uppernarsaat kiisalu ilanngussat pisariaqartut katiffigiumasap kommunianut tunniullugilluunniit nassiutissavasi. Misilinneqarnermik uppernarsaatip katinnissamut piumasaqaatit eqquutsikkisi ulloq tunniussivimmiit qaammatit sisamat taanna atuuttuusoq uppernarsassavaa.

Misilinneqarnermik uppernarsaat immersorneqarlunilu naqissuserneqarsimalereerpat allaffimmiit nalunaarummik pissarsissaasi.

Misilinneqarnermik uppernarsaat sumiiffimmi katiffigisassassinnut katiffissaq sioqqullugu tunniutissavarsi.


Malugiuk
Nunami allamiut Kalaallit Nunaanni katinniartut, misilinneqarnermik uppernarsaat (Declaration) kommunimut katiffiusussamut piffissaalluarallartillugu nassiutissavaat.

Declaration

Nunat avannarliit avataanni innuttaassuseqartut, saniatigut pas-imik piviusumik takutitsillutillu unioqqutitsisuunngitsumik Kalaallit Nunaanniinnertik uppernarsassavaat.

Aappariinnerup allagarserneqarnera aamma kommunimit isumagineqartarpoq.

Oqaluffimmi katinnissarsi kissaatigigussiuk, ilagiinni akuerisaasuni palasimut saaffiginnissinnaavusi.

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Naalagaaffiup Sinniisoqarfia
Indaleeqqap Aqq. 3
Postboks 1030
3900 Nuuk

Oqarasuaat: (+299) 32 10 01
E-mail: ro@gl.stm.dk
Nittartagaq: www.rigsombudsmanden.gl