Namminersorlutik Oqartussat inissiaataat attartortittakkat

Nalinginnaasumik paasissutissiineq 

Inissiaq attartortittagaq tassaavoq assersuutigalugu inissiaq inissiarsuarmiittoq qaammammut ineqarnermut akiliuteqarlutit inissiap piginnittuanit attartorsinnaasat. Pisortat inissiaataat attartortittakkat Namminersorlutik Oqartussanit imaluunniit kommuninit pigineqarput. Namminersorlutik Oqartussat inissiaataat attartortittakkat tamarmik Inissiaatileqatigiiffik INI A/S-imit imaluunniit Illuut A/S-imit aqunneqarput.

Inissiaatileqatigiiffik INI pillugu paasissutissat allat atuakkit

Kommunit inissiaataat attartortittakkat Inissiaatileqatigiiffik INI A/S-imit, ingerlatseqatigiiffimmit aqutsinermik ingerlatsisumit allamit, soorlu Iserit A/S-imit imaluunniit kommunimit namminermit aqunneqarput.

Inissiat attartortittakkat pillugit apeqqutissaqaruit Inissiaatileqatigiiffik INI A/S imaluunniit Illuut A/S attaveqarfigisinnaavat. Tassanngaanniit maleruagassat, inissiat attartukkat aamma ineqarnermut akiliutit qanoq aalajangersarneqarsimanersoq pillugit paasissutissinneqarsinnaavutit.

Pisussaaffiit 

Inissiamik attartortittakkamik Namminersorlutik Oqartussanit pigineqartumik attartornerup aalajangersimasunik pisussaaffeqalerneq malitsigisarpaa.

Assersuutigalugu attartortutut pisussaavutit:
• Piffissaq eqqorlugu ineqarnermut, imermut kiassarnermullu akiligassat akilissallugit
• Inissiaq attartukkat isumannaatsumik pitsaassuseqartissallugu aammalu sumiginnaanissaq pinaveersaassallugu. Tassalu inissiami qilaat qaqorsarnissaat, iikkat qalipannissaat tapetilersornissaalluunniit, kiisalu naqqit lakkernissaat illit akisussaaffigaat

Tamatuma saniatigut inissiani attartortittakkani tamani torersaarnissamut maleruagassat malittussaavatit. Assersuutigalugu:
• Qimmeqaqqusaanngilatit qitsuuteqaqqusaanallu attartortitsisumit allakkatigut akuersissuteqaqqaarnak
• Nal. 8 sioqqullugu aamma nal. 19 kingorna sakkunik nipiliortunik atueqqusaanngilatit
• Imerpalasunik ikuallajasunik, soorlu benzin-amik, petrolium-imik, terpentin-amik lakkinillu peqqusivimmi ininiluunniit assigisaanni uninngatitseqqusaanngilatit
• Inissiaatileqatigiiffik INI A/S-imut isumaqatigiissuteqaqqaarnak piffissaatinnagu inissiamit attartukkannit nooqqusaanngilatit

Attartortutut pisussaaffitit eqquutsinngikkukkit tamanna attartornivit atorunnaarsinneqarneranik kinguneqarsinnaavoq. Tassalu inissiamit attartukkannit anisitaasinnaavutit.

Ikkussuinerit 

Inissiami attartukkanni aalajangersimasunik atortulersuinissaq pisinnaatitaaffigaat.

Assersuutigalugu:
• Errorsivimmik ikkussisinnaavutit
• Utoqqarnut imaluunniit inunnut innarluutilinnut ikiuutissanik ikkussuisinnaavutit

Inissiami attartukkanni atortulersuilinnginninni allannguutissat Inissiaatileqatigiiffik INI A/S-imit akuerineqartussaapput.

Inissiamik attartukkamik allamut attartortitseqqinneq 

Pisortat inissiaataanni attartortittakkami attartortuuguit, inissiaq attartukkat allanut attartorteqqissinnaavat. Tassalu inissiaq attartortittagaq qimaqqanerani inummut allamut attartortissinnaavat.

Attartukkamik allamut attartortitsinermi piumasaqaataavoq peqannginnissat ataavartuussanngitsut aammalu assersuutigalugu peqqutaassasut:
• Napparsimaneq
• Ilinniagaqarneq
• Pinerluuteqarsimasunut inissiisarfimmiitinneqarneq
• Nuukkallarneq, soorlu illit sulinerit imaluunniit inoqitivit arlaata sulinera pissutigalugu

Inissiaq najukkat taamaallaat piffissami aalajangersimasumi utaqqiisaagallartumik allamut attartortissinnaavat. Tassalu attartukkamik allamut attartortitsineq:
• Qaammatinit pingasunit sivikinnerussanngilaq
• Ukiunit pingasunit sivisunerussanngilaq

Inissiaq attartukkat allamut aatsaat attartortissinnaavat, ingerlatseqatigiiffik inissiamik attartukkannik aqutsisuusoq, soorlu Inissiaatileqatigiiffik INI A/S imaluunniit Iserit A/S attartukkamik allamut attartortitsinissamut illit attartortussanngortullu akunnissinni isumaqatigiissutissinnik akuersisimappat. Inissiaq attartukkat kommunimit aqunneqartuuppat, kommunip isumaqatigiissut akuerisussaavaa.

Allamut attartortitseqqinnissamut qinnuteqarit

Attartornissamut isumaqatigiissut malissimanngikkukku attartukkamik allamut attartortitsisinnaanngilatit.

Allaaserisat attuumassutillit

Ineqarneq pillugu maalaarnissamut ataatsimiititaliaq

Atuisartoqarnermut Unammilleqatigiinnermullu Aqutsisoqarfik

Postboks 689
3900 Nuuk

Oqarasuaat: (+299) 32 80 33
E-mail: maalaarut@nanoq.gl
Nittartagaq: aua.gl

Ammasarfiit
Ulluni suliffiusuni 10:00 – 15:00