Attartortumiit piginnittumut – Qinnuteqarneq

Attartortumiit piginnittumut – Qinnuteqarneq 

Inissiaq attartukkat pisiariniarlugu qinnuteqarusukkuit qinnuteqaasiussaatit. Qinnuteqaatit sumut nassiutissanerit, kiap inissiaq najukkat pigineraa kinalu aqutsisuunersoq apeqqutaassaaq.

Inissiaq attartukkat Namminersorlutik Oqartussanit pigineqarpat, qinnuteqarnermi immersugassaq immersussavat. Taanna e-mail-ikkut pigiuk@nanoq.gl saaffigalugu pissarsiarisinnaavat. Aamma oqarasuaatikkut oqarasuaammut 34 50 00-imut saaffiginnissinnaavutit. Oqarasuaat ulluinnarni nal. 08.00 – 16.00 akornanni ammasarpoq.

Inissiaq attartukkat kommunimit pigineqarpat, aammalu Iserit A/S-imit aqunneqarpat, qinnuteqaatit Iserit A/S-imut nassiutissavat.

Inissiaq attartukkat kommunimit najukkannit aqunneqarpat pigineqarlunilu, qinnuteqaatit najukkanni innuttaasunut sullissivimmut nunaqarfimmiluunniit allaffimmut nassiutissavat.

Qinnuteqaammut tunisinermi akiusup 60%-ianik aningaasalersuinissamut periarfissatit pillugit aningaaserivimmit nalunaarut pisussaaffiliinngitsoq (siumoortumik akuersissut) ilanngutissavat.

Suliami suliarinninneq
Qinnuteqaatit aningaaserivimmiillu siumoortumik akuersissut tiguneqarpata suliamik suliarinninneq aallartissaaq. Suliamik suliarinninnermi qinnuteqaatip akuerineqarsinnaanerata isummerfigineqannginnerani Namminersorlutik Oqartussat, kommunip imaluunniit Iserit-ip inissiaq pillugu paasissutissat pisariaqartut pissarsiariniaqqaassavai. Qinnuteqaat akuerineqarpat suliaq eqqartuussissuserisumut, niuernerup ilumoorneranik uppernarsaasussamut nassiunneqassaaq.

Illumik nammineerluni pigisamik tigusineq
Qinnuteqaatit akuerineqarpat, uku ilinnut nassiunneqassapput:
  • Illumik attartukkannik illutut nammineerluni pigisatut tigusisinnaaninnut allakkatigut neqeroorut
  • Illup nammineerluni pigisap illutaanut nassuiaatit pillugit paasissutissat
  • Illup nammineerluni pigisap niuernermi nalinga pillugu paasissutissat
  • Akiitsut piumasaqaatillu immikkut ittut, tigusinerup kingorna illumut nammineerluni pigisamut tunngassuteqarsinnaasutut naliliiffigineqartut pillugit paasissutissat

Allakkatigut neqeroorutip tigunerata kingorna qaammatit pingasut qaangiutsinnagit tigusinissaq akuerissavat.

Inissiamik nammineerluni pigisamik tigusineq
Qinnuteqaatit akuerineqarpat, illuutini attartortittakkani assigiinngitsuni inissiat inissianut pigisanut namminersorlutik immikkoortunut agguarneqassapput. Tamatuma peqatigisaanik Namminersorlutik Oqartussat, kommune imaluunniit Iserit inissiaatillit peqatigiiffissaannik pilersitsinissamut, piginnittullu peqatigiiffiisa malittarisassaannik suliaqarnissamut ikiuutissapput.

Tamatuma kingorna Namminersorlutik Oqartussat, kommune imaluunniit Iserit ukuninnga ilinnut nassiussissaaq:
  • Inissiap attartukkavit inissiatut nammineerluni pigisatut tigusinnaaneranut allakkatigut neqeroorut
  • Inissiaatillit peqatigiiffiat pillugu paasissutissat malittarisassallu assilineri
  • Inissiap nammineerluni pigisatut tunisinissamut najoqqutassat ilivitsut, kisitsisitaannik agguaaffiusut
  • Inissiap nammineerluni pigisap illutaanut nassuiaatit pillugit paasissutissat
  • Inissiap nammineerluni pigisap niuernermi nalinga pillugu paasissutissat
  • Najugaqarfimmi imaluunniit ingerlatsinermut aserfallatsaaliuinermullu immikkoortortami, inissiap nammineerluni pigisap inissisimaffiani ukiumi pineqartumi ingerlatsinermut missingersuutit
  • Najugaqarfimmi imaluunniit ingerlatsinermut aserfallatsaaliuinermullu immikkoortortami, inissiap nammineerluni pigisap inissisimaffiani naatsorsuutit akuerisat kingulliit
  • Akiitsut piumasaqaatillu immikkut ittut, tigusinerup kingorna inissiamut nammineerluni pigisamut tunngassuteqarsinnaasutut naliliiffigineqartut pillugit paasissutissat

Allakkatigut neqeroorutip tigunerata kingorna qaammatit pingasut qaangiutsinnagit tigusinissaq akuerissavat.

Attartortut sinneruttut
Illuummi inissiat inissianut nammineerluni pigisanut agguarneqareerpata Namminersorlutik Oqartussat, kommunip imaluunniit Iserit-ip uku attartortunut sinneruttunut nassiutissavai:
  • Inissiat attartukkatik inissiatut nammineerluni pigisatut tigusinnaagaat pillugu nalunaarut
  • Inissiaatillit peqatigiiffiat pillugu paasissutissat malittarisassallu assilineri

Attartortup inissiaq najukkani pisiarerusunngikkuniuk
  • illuummi attartortutut najugaqaannarsinnaavoq. Tamatuma kingorna ineqarnermut akiliut attartukkani taamaattuni ineqarnermut akiliutinik naatsorsuisarnermut maleruagassat nalinginnaasut malillugit aalajangerneqassaaq
  • imaluunniit illoqarfimmi najukkami inissiamut allamut neqeroorut akuerisinnaavaa

Attartortuuinnassagaanni, eqqumaffigineqassaaq
  • ineqarnermut akiliut attartukkani taamaattuni ineqarnermut akiliutinik naatsorsuisarnermut maleruagassat nalinginnaasut naapertorlugit aalajangerneqartarmat
  • inissiaatillit peqatigiiffiata malittarisassaat malinneqassasut
  • aammalu inissiaq attartugaq kingusinnerusukkut pisiarineqarsinnaammat

Inissiaatillit peqatigiiffianni inissiaq qimanneqarpat, inissiaq tamanut ammasumik neqerooruteqartitsinikkut tuniniarneqassaaq, aammalu attartorteqqinneqassanngilaq.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik
Imaneq 1A - 601
Postboks 909
3900 Nuuk

Oqarasuaat: (+299) 34 50 00
E-mail: box909@nanoq.gl
Nittartagaq: www.naalakkersuisut.gl