INI-p inissiaataanik attartortittakkanik pitsanngorsaaneq – Utertillugit akiliuteqarneq

INI-p inissiaataanik attartortittakkanik pitsanngorsaaneq – Utertillugit akiliuteqarneq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq INI-p inissiamut tunngasut nalinginnaasut isumagisarpai. Naak attartukkannik najugaqaraluarlutit – tassa inissiaq nammineq piginagu – kissaatitit malillugit inissiavit pitsanngorsarnissaanut periarfissaqarputit.

Pitsanngorsaanermik suliaqarneq tassaavoq illit inissianni allannguinerit, attartortussamut tulliuttumut iluaqutaasinnaasut. Allannguinerit nammineq akilissavatit. Taamaattoq attartortussamut tulliuttumut taakku iluaqutaasinnaammata – tassa inissiap nalinganik qaffariartitsillutik – anillutit nuukkuit, pitsanngorsaanermik suliaqarnermut aningaasartuutivit ilai utertillugit pissarsiarinissaannut periarfissaqarputit.

Pitsanngorsaanermik suliaqarnermi aningaasat ikinnerpaamik 2.000 kr.-iussapput amerlanerpaamillu 100.000 kr.-iussallutik.

Anillutit nuukkuit pitsanngorsaanermik suliaqarnerup nalinga ilinnut akilersissinnaavat, taamaattoq aningaasat 1 %-imik nalikillilerneqarsimassapput, piffissamit INI-p pitsanngorsaanissamut akuersineraniit naatsorsorlugit. Tamatuma kingunerisaanik allannguinerit akuerineqarnerisa kingorna qaammatit 100-it qaangiuttut anillutit nuukkuit, allannguinernut aningaasartuutitit utertissinnaassanngilatit.

Assersuutigalugu pitsanngorsaavutit illit igaffinni nutaamik nerriviusalerlugu, nutaamik errorfilerlugu aamma nutaamik kissarsuutilerlugu. Katillugit akeqartumik 25.000 kr.-inik. Sulinerup ingerlanerani errorfik nutaanngitsoq, nerriviusaq aamma kissarsuut nutaanngitsoq 5.000 kr.-it nalingannut taarserpatit.

Pitsanngorsaanermik suliaqarneq taamaalilluni naleqarpoq:
25.000 – 5.000 = 20.000 kr.

INI-p akuersinerata kingorna ukiut sisamat (= qaammatit 48-it) qaangiuttut anillutit nuupputit. Taamaalilluni pitsanngorsaanermik suliaqarnerup nalingata 100 %-iusup ilaa illit pissat tassaalissaaq, 100 % - 48 % = 52 %.

Tamatuma kingunerisaanik ilinnut aningaasat tunniunneqassapput katillugit, 20.000 x 52 % = 10.400 kr.


Malugiuk
Pitsanngorsaanermik suliaqarnerup nassatarisimappagu ikkussukkanik pioreersunik imaluunniit illup ilaanik peersisoqarluni, taakku nalingisa sinnerat pitsanngorsaanermik suliaqarnerup nalinganit ilanngaatigineqassapput.

Pitsanngorsaanermik suliaqarneq tamakkiisumik suliarineqarsimanngippat, suliaqarnerup ingerlanneqarsimasup nalinga naatsorsorneqassaaq.

Allaaserisat attuumassutillit

A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl