INI-mi attartortut akornanni inissianik paarlaattarneq – Nalinginnaasumik paasissutissiineq aamma qinnuteqarneq

INI-mi attartortut akornanni inissianik paarlaattarneq – Nalinginnaasumik paasissutissiineq aamma qinnuteqarneq 

INI-p inissiaataa attartortittagaq tassaavoq pisortat inissiaataat attartortittagaq, Namminersorlutik Oqartussanit imaluunniit kommuninit pigineqartoq aammalu INI-mit aqunneqartoq. Tassa imaappoq INI-p inissiamut tunngasut nalinginnaasut amerlasuut isumagisarpai, assersuutigalugu attartortut akornanni inissiamik paarlaannerit isumaginerat.

INI-p inissianik attartortittagaanni najugaqaruit, attartortorlu alla inissiamik paarlaannissassinnut periarfissaqarpusi.

Ilinnik inissiamik paarlaasseqateqarumasumik nammineerlutit nassaartussaavutit. INI-p nittartagaani inissiamik paarlaakkumasut inuit allat saqqummiussisut atuarsinnaavatit aamma illit paarlaasseqatissarsiornerit nammineerlutit saqqummiussinnaavat.


Piumasaqaatit
Inissiamut illit inoqutigiinnut naammattumik taamaallaat paarlaassinnaavutit. Tassa imaappoq, assersuutigalugu kisimiittuuguit inissiamut pingasunik sinittarfilimmut nuussinnaanngilatit.

Matuma saniatigut piumasaqaatit arlallit naammassineqarsimassapput, illit inissiamik paarlaassinnaalissaguit:
  • Marluullusi attartornermi isumaqatigiissutisi eqquutsissimassavasi
  • Attartornermi isumaqatigiissutisi atorunnaarsissimassanngilasi
  • Maanna attartugarsi tunngavigalugu aningaasanik INI-mut akiitsoqassanngilasi
  • Inissiarisasi inunnit allanit attartugarissanngilasi

Inissiamik paarlaanneq
Periutsit marluk atorlugit inissiamik paarlaattoqarsinnaavoq:
  • Attartornermik isumaqatigiissutit nutaanngitsut atorunnaarnissaat inissiamullu paarlaaffigisassinnut nutaamik attartornermik isumaqatigiissusiornissaq toqqarsinnaavarsi
  • Imaluunniit ilissi attartornissamut isumaqatigiissutisi ingerlatiinnassallugit toqqarsinnaallugu

Attartornermut isumaqatigiissutisi nutaanngitsut atorunnaassallugit aammalu inissiamik attartornermi isumaqatigiissutit nutaat atulernissaat toqqarussiuk, inissiasi misissorneqassapput nalinginnaasumillu iluarsartuunneqarlutik – soorlu inissiarilikkamut nalinginnaasumik nuunnerup asserluinnaatut. Iluarsartuussinermut aningaasartuutaasinnaasut illit sillimmatitut akiliutigisanniit ilanngaanneqassapput, taakku ilinnut utertinneqarnissaat sioqqullugu. Inissiaq nutaaq tigugukku, attartornermut isumaqatigiissut nutaaq atsiussavat.

Marluullusi attartornermut isumaqatigiissutisi 1995-imi januar-ip aallaqqaataata kingorna atulersimagussigit, attartornermut isumaqatigiissutisi ingerlatiinnassallugit aamma toqqarsinnaavarsi. Tamatuma kingunerisaanik marluullusi attartornermut atatillugu pisussaaffisi akisussaaffisilu paarlaatissavasi. Tassa imaappoq:
  • Ajoqusernerit attartortup siulliup atuinerani pinngorsimasut illit akisussaaffigilissavatit
  • Imermut kiassarnermullu akiligassarisasi paarlaallugit tigussavasi. Tamatuma kingunerisaanik illit kiassarnermut immikkut akiligassaqalersinnaavutit, paarlattuanik illit illuatungerisat aningaasanik utertoortoq, tassa akilikkannit minnerusumik atuisimaguit
  • Qularnaveeqqutitut akiliut attartornermut malinnaasarpoq. Inissiamit nuukkuit qularnaveeqqutit akiliutit utertillugu tigusinnaavat illit illuatungivit akilersimasaa, nalinginnaasumik iluarsartuussinermut aningaasartuutit ilanngaatigereerlugit. Qularnaveeqqutitut akiliutit angissusiat assigiinngissuseqarpat, aaqqiissummik naammaginartumik nammineerlusi nassaassaasi

Iserterussi inissiaq tamatuma saniatigut nalinginnaasumik iluarsartuunneqassanngilaq. Taanna toqqaannartumik tigussavarsi siusinnerusukkut attartortup qimatsineratuut.


Qinnuteqarneq
Inissiarisannit nuukkumaguit paarlaasseqatissannillu nassaarsimallutit immersugassaq immersussavarsi:

Inissianik paarlaasseqatigiinnissamut qinnuteqarneq

Immersuiffissaq marluullusi immersoreerussiuk atsiorlugulu, taanna najukkassinni INI-p allaffeqarfianut tunniutissavarsi.
INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl