Inissialiornermut tapiissuteqartarneq (Boligstøttehuse) aqqutigalugu illuutit – Oquk immikkut ittumik

Inissialiornermut tapiissuteqartarneq (Boligstøttehuse) aqqutigalugu illuutit – Oquk immikkut ittumik 

Inissialiornermut tapiissuteqartarneq aqqutigalugu illuut tassaavoq illu inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq illumik piginnittoq Namminersorlutik Oqartussanit illumik sananissamut aningaasanik taarsigassarsisimassaaq. Taarsigassarsiarisat tamaasa akilersoreernissaasa tungaannut, Namminersorlutik Oqartussanut pisussaaffeqartoqartarpoq. Inissialiornermut tapiissuteqartarneq aqqutigalugu illuutit Namminersorlutik Oqartussat sinnerlugit INI-mit aqunneqarpoq. Taamaammat aamma INI attaveqarfigissavat, inissialiornermut tapiissuteqartarneq aqqutigalugu illit illuutit oqoqartoq pasitsaakkukku.


Oquup pinngorfia (Skimmelsvamp) tassaavoq oquk, tassanngaanniillu pujoralaat tappiorannartut siammartertarput peqqissutsimut ajoqutaasinnaasut. Oquk illuni isugutattuni nassaassaagajuppoq, qaleriaartumillu naasarpoq assigiinngitsorpassuarnik qalipaateqarluni, soorlu qernertuulluni, kajorujulluni qorsuulluniluunniit. Oquk nalinginnaasumik nassaassaasarpoq:

  • Ungalitsap (tapet) qaani ataaniluunniit
  • Teqeqquni
  • Naqqup ataani
  • Illup ilaani allani, isugutserfiusartuni


Oquk ukiuni kingullerni ajornartorsiutaalersimavoq aamma illut inissiallu amerlasuut eqqugaasimallutik. Taamatuttaaq inissialiornermut tapiissuteqartarneq aqqutigalugu illuutillit arlallit, illuutiminni oqummik – pingaartumik illuni pisoqaanerusuni – peqartoq pasitsaassaqartarsimapput.  


Pinaveersaartitsineq

Oquup pinngitsoortinnissaa pitsaanerpaaq tassaavoq, illuit isugutsinnginnissaa. Taama iliorsinnaavutit assersuutigalugu imaaliornikkut:

  • Uffarfiup igaffiullu silaannarissartarnissaat isumagalugu
  • Atisat illup iluani panersernissaat sapinngisamik pinaveersaarlugu
  • Silamiit erngup isaasinnaanera eqqumaffigalugu
  • Erngup aqqutaasa ussiissisinnaanerat nakkutigalugu. Assersuutigalugu tassaasinnaapput erngup kuuffiiniit, perusuersartarfimmiit, erruivimmiit imaluunniit errorsivimmiit ussiitsoqartoq


Init kiassarneqanngitsut isugutsersinnaanerat aarlerinartoqarnerummat tamanna eqqumaffigissavat.



Oquk pillugu pasitsaassineq

Illuit oqoqarsinnaanera pasitsaakkukku, najukkanni INI-p allaffeqarfia attaveqarfigisinnaavat. INI-p suliffeqarfik illit illuit oqoqarneranik misissuisinnaasoq innersuussinnaavaa. Matuma kingorna allakkat puuat ilitsersuummik kalaallisut qallunaatullu allassimasumik, misiliinermullu atortunik imalik ilinnut nassiunneqassaaq. Nammineerlutit misiligutissanik tigusissaatit allakkallu puuannut ikeriarlugu suliffeqarfimmut utertillugu nassiutissavat, kingornalu akissutisissaatit. Misiligummik tigusiffigisat aamma assiligukku ilanngullugulu nassiullugu tamanna iluaqutigisinnaavat. Oqummik misissuineq qanoq akeqassanersoq suliffeqarfiup ilinnut nalunaarutigissavaa.


Illit illunni oqoqarpat peerneqartariaqarpoq. Tamatuma kingunerisaanik:

  • Oqoqarfiusoq klorin atorlugu asanneqartariaqarsinnaavoq
  • Sananeqaatitut atukkat taarserneqartariaqarsinnaapput
  • Illu nutarterneqartariaqarsinnaavoq

Nammineerlutit akiliissaatit, tassami illit nammineerlutit illu pigaat aserfallatsaalinissaalu pisussaaffigalugu.  

Allaaserisat attuumassutillit

A/S INI
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl