Inissialiornermut tapiissuteqartarneq (Boligstøttehuse) aqqutigalugu illuutit – Ikuallattoornermut aamma anorersuarneranut sillimmasiinerit

Inissialiornermut tapiissuteqartarneq (Boligstøttehuse) aqqutigalugu illuutit – Ikuallattoornermut aamma anorersuarneranut sillimmasiinerit 

  • Qaasuitsup Kommunia

Inissialiornermut tapiissuteqartarneq aqqutigalugu illuut tassaavoq illu, inissialiornermut tapiissuteqartarnermik aaqqissuussineq atorlugu sananeqarsimasoq. Tassa imaappoq illumik piginnittoq Namminersorlutik Oqartussanit illumik sananissamut aningaasanik taarsigassarsisimassaaq. Taamaammat taarsigassarsiarisat nalikillilerneqarnissaat imaluunniit taarsigassarsiarisat tamakkiisumik akilersimanissaat tikillugu, Namminersorlutik Oqartussanut arlalinnik pisussaaffeqartoqartarpoq. Namminersorlutik Oqartussat sinnerlugit inissialiornermut tapiissuteqartarnermik aaqqissuussineq INI-mit aqunneqarpoq. Tamatuma kingunerisaanik inissialiornermut tapiissuteqartarneq aqqutigalugu illuummik piginnittutut INI attaveqarfigisartussaavat.

 

Inissialiornermut tapiissuteqartarneq aqqutigalugu illuummik piginnittuuguit, ikuallattoornermut aamma anorersuarneranut sillimmasiinermik peqartussaavutit. Sillimmasiinerup matussusertussaavai:

  • Illumi ikuallattoornermi aamma anorersuarnerani ajoqusersimasut iluarsaannerat
  • Ajoqusernerit, tamanna pisariaqassappat, iluarsaannerisa nalaanni utaqqiisaasumik ineqartitaaneq. Utaqqiisaasumik najugaqarfigisat INI-mut nalunaarutigissagakku eqqaamassavat

 

Sillimmasiinermut akiliutissaq akilereerukku aatsaat sillimmasiineq atuussinnaalissaaq.

 

Ikuallattoornermi ajoqusernerit

Ajutoorneq pisimappat illulu ikuallannermit ajoqusersimappat, taava piaartumik:

  • Illu annertunerusumik ajoquseqqunagu isumannaassavat
  • Sillimmasiisarfik attaveqarfigissavat ajoqusernerlu nalunaarutigalugu

 

Taassuma saniatigut INI attaveqarfigissavat, taassuma pissavai:

  • Sillimmasiisarfimmut nalunaarutip nuutinnera
  • Ikuallattoorneq pillugu nalunaarut aamma politiit nalunaarutaata nuutinnera, politiit nalunaarutaat sananeqarsimappat

 

Anorersuarnerani ajoqusernerit

Illut anorersuarnerani ajoqusersimappat, taava illit:

  • Illu annertunerusumik ajoquseqqunagu isumannaassavat. Maluginiassavat illup qalissiaa, igalaavi imaluunniit illup sannai allat anorersuup ajoqusersimasinnaammagit
  • Sillimmasiisarfik attaveqarfigissavat ajoqusernerlu nalunaarutigalugu
  • INI attaveqarfigissavat ajoqusernerullu annertussusaa nalunaarutigalugu

 

Taarsiissuteqarneq
Sukkulluunniit inissialiornermut tapiissuteqartarneq aqqutigalugu taarsigassarsiatit qularnaveeqqusersinnaavatit. Taama iliorsinnaavutit illup nalinga qularnaveeqqutigalugu. Illu ajoqusernermigut nalikillisarmat, INI-p piumasarisarpaa illit, sillimmasiisarfik aamma INI isumaqatigiissuteqassasusi, ajoqusernerit suut sillimmasiisarfimmit matussuserneqassanersut.

 

Illut annikitsuinnarmik ajoqusersimappat, isumannaassavat ajoquserneq sukkanerpaamik iluarsaanneqassasoq, taamaalilluni taarsigassarsianut qularnaveeqqutaasup nalinga appartinneqassanngimmat.

 

Illut tamakkivilluni ikuallappat, illumik nutaamik taartissaanik sanasoqarnissaa isumannaassavat. Matuma kingorna inissialiornermut tapiissuteqartarneq aqqutigalugu taarsigassarsiannut illu nutaaq qularnaveeqqutinngussaaq.

 

Illup nutaap sananeqarnerani aningaasartuutit tamakkerlugit sillimmasiissutip matussusinngippagit, aningaasartuuteqarneruneq nammineerlutit aningaasalersugassaraat. Tassa illup sananeqarneranut Namminersorlutik Oqartussaniit aningaasanik amerlanerusunik taarsigassarsisinnaanngilatit. Sillimmasiisarfiup illup pitsaaqaa angeqqataalu ilinnut neqeroorutigippagu, ilinnut aamma INI-mut sillimmasiisarfiup allaganngorlugu qulakkiissavaa, inissialiornermut tapiissuteqartarneq aqqutigalugu taarsigassarsiannut naleqquttumik qularnaveeqqusiinissamut illu naleqarumaartoq.

 

Malugiuk

Taarsigassarsiannut qaammatikkaartumik akiliuteqartarnerit ingerlaannassaaq – aamma illup ajoqusernerisa iluarsaanneqarnerisa nalaanni. Akiliinngitsoorneq pisussaaffimmik sumiginnaanertut isigineqassaaq. Pisussaaffimmik sumiginnaanerup nassatarissavaa, akiitsut sinneri, taarsigassarsiat kiisalu kinguaattoorutaaratarsimasinnaasut ataatsikkut tamaasa illit akilertussanngortussaagakkit. Taamaammat taarsigassarsiannut qaammatikkaartumik akiliuteqartarnerit ingerlatiinnarneqarnissaa isumagissavat.


Allaaserisat attuumassutillit

INI A/S
E-mail: ini@ini.gl
Oqarasuaat: 70 10 00
Fax: 86 57 00

Ammasarfii:
Ataasinngornermiit tallimanngornermut 08.00 - 16.00
Inissialiornermut tapiissuteqartarneq 10.00 - 14.00

Toqqaannartumik sianerfissat:
Inissiat attartortittakkat: 70 10 00, 1 tooriarlugu 1 toorlugu
Inissialiornermut tapiissuteqartarneq aqqutigalugu illuutit (Boligstøttehuse): 70 10 00, 1 tooriarlugu 2 toorlugu
Saaffiginnittarfik: 70 10 00, 1 tooriarlugu 9 toorlugu

Nittartagaq: www.ini.gl