Qinnuteqarneq

Qinnuteqarneq 

Inissiamik nutaamik soorlu illumik imaluunniit illuummik annerusumik sanassaguit, inissianut aningaasaliissutissanut taarsigassarsinissamik qinnuteqarsinnaavutit. Inissianut aningaasalersuinermut taarsigassarsiat tassaapput taarsigassarsiat, Naalakkersuisunit aamma kommunimi najugarisanni kommunalbestyrelse-mit taarsigassarsiaritinneqartartut. Naalakkersuisut aamma kommunalbestyrelse tamarmik immikkut inissiap sananeqarnerani aningaasartuutit tamarmiusut 20%-iinik taarsigassarsitissinnaavaatsit. 60 %-it sinneruttut aningaasalersorneqarnissaat illit nammineerlutit isumagissavat. Taamaattumik inissianut aningaasalersuinissamut taarsigassarsiat aamma 20-20-60-inik taaneqartarput.


Qinnuteqarneq
Inissiamik aningaasalersuinissamut taarsigassarsiassanik qinnuteqarniaruit qinnuteqaasiussaatit.

Qinnuteqaativit imarissavai:

  • Suliassanut nassuiaat, inissiat amerlassusaannut inissiallu ataatsip angissusianut paasissutissanik ilaqartinneqartoq
  • Sanaartugassami sanaartugassanut aningaasartuutissanut tamarmiusunut missingersuutit
  • Kommunalbestyrelse-miit nunaminertamik inniminniissut nunaminertamillu atugassinneqarneq
  • Nammineerlutit aningaasalersuutissanik pissarsisinnaaninnut uppernarsaat
  • Kinaassutsinnut ilisarnaat erseqqissoq


Qinnuteqaativit assilineri marluk nassiutissavatit: Ataaseq Naalakkersuisunut aamma ataaseq kommunimi najukkanni kommunalbestyrelse-mut.


Piumasaqaatit
Taarsigassarsiassat aallaqqaammut neriorsuutitut tunniunneqassapput. Taarsigassarsitinneqarnissamut neriorsuut annaassanngikkukku:

  • Taarsigassarsitinneqarnissamik neriorsuutip tiguneraniit ukiut marluk qaangiutsinnagit inissiaaternik sanaartornerit aallartissavat. Taamaattumik ukiut marluk qaangiutsinnagit sanaartugassat aallartissimanerlugit paasissutissamik nassiussissaatit
  • Taarsigassarsitinneqarnissamik neriorsuutip tiguneraniit ukiut pingasut qaangiutsinnagit inissiaaternik sanaartornerit naammassisimassavat. Taamaattumik ukiut pingasut qaangiutsinnagit kommunimit atuilernissamut akuersissutip assilinera Naalakkersuisunut nassiutissavat


Taakku naammassisimanngikkukkit taarsigassarsitinneqarnissamik neriorsuutisiat siumoortumik ilisimatitsinertaqanngitsumik atorunnaarsinneqassaaq.

Aatsaat inissiaq sananeqareerpat najugaqarfigineqarnissaminullu piareerpat taarsigassarsiassat tunniunneqassapput. Taarsigassarsiassat tunniunneqarnissaat anguniarlugu uku nassiutissavatit:

  • kommunimit atuilernissamut akuersissut
  • sanaartornermut naatsorsuutit inaarutaasut uppernarsarneqarsimasullu
  • qularnaveeqqusiussaqarluni taarsigassarsinermi allagartap nalunaarsorsimasup naqissuserneqarsimasullu naqeqqaarnera uparuaanertaqanngitsoq
  • sillimmasiissut
  • aamma qularnaveeqqusiiffigisap nalunaarutaata nalunaarsorsimasup naqeqqaarnera


Matuma siuliani allassimasut assilinerinik ataatsinik Naalakkersuisunut aamma assilinerinik ataatsinik kommunalbestyrelse-mut nassiussissaatit.

Naalakkersuisuniit taarsigassarsiassat siusinnerpaamik ukiumi taarsigassarsinissamut aningaasaliissutissat Inatsisartut aningaasanut inatsisaannut ilanngunneqarfianni tigusinnaavatit. Taamatuttaaq kommunimi najukkanni kommunalbestyrelse-mit taarsigassarsiassatit siusinnerpaamik ukiumi taarsigassarsinissamut aningaasaliissutissat kommunalbestyrelse-p missingersuutaannut ilanngunneqarfianni tigusinnaavatit.


Taarsigassarsiat utertillugit akilersornerat
Taarsigassarsiat erngerlutit utertillugit akilernissaannut pisussaaffeqarputit:

  • Taarsigassarsianut erniat akilersuutillu akilinngikkukkit, aamma taarsigassarsiat killiliussap naanissaa sioqqullugu utertillugit akilinngikkukkit
  • Inissiaq isumannaatsumik aserfallatsaalisimanngikkukku, taamaalillunilu Naalakkersuisut kommunalbestyrelse-llu qularnaveeqqusiinerat ajornerulersinneqarpat
  • Inissiaq ikuallattoornissamut anorersuarmillu ajoquserneqarnissaanut sillimmasersimanngikkukku
  • Inissiaq attartornermut akiliutinik aalajangiisarnermut aalajangersakkat uniorlugit piumasaqaateqarfiusumik attartortikkukku
  • Inissiami ininik inuussutissarsiorfiusunik pilersitsiguit imaluunniit inissiamiit inuussutissarsiummik ingerlatsiguit. Taamaattorli inuussutissarsiutit iluanaarnannginnerusut inissiamit ingerlanneqarsinnaapput


Malugiuk
Inissiamut aningaasaliissutissanik taarsigassarsiniarlutit qinnuteqarninni akitsuut pisortanit taarsigassarsiassat 0,5%-iinik annertussusilik akilissavat. Akitsuut qinnuteqaativit suliarineqarneranut aningaasartuutinut matussutissaavoq.

Aningaasaliissutini aningaasat naammanngippata, taarsigassarsitinneqarnissat Naalakkersuisunit qulakkeerneqarsinnaanngilaq.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl