Piginneqatigiilluni inissiat – Nalinginnaasumik paasissutissiineq

Piginneqatigiilluni inissiat – Nalinginnaasumik paasissutissiineq 

Piginneqatigiilluni inissiaq inissiaavoq piginneqatigiilluni inissiaatillit peqatigiiffiannit pigineqartoq, aammalu peqatigiiffimmi ilaasortaasut atuisinnaatitaaffigisaat. Tassalu piginneqatigiilluni inissiaatillit peqatigiiffiannut ilaasortat inissiat najukkatik namminneerlutik pigisarinngilaat. Kisiannili tamarmik immikkut peqatigiiffiup pigisaanut piginneqataapput. Taamaattumik piginneqatigiilluni inissiaatillit peqatigiiffianni ilaasortat piginneqataasunik taaneqartarput. Piginneqatigiilluni inissiaatillit peqatigiiffiat ataatsimik amerlanerusunilluunniit illuuteqarsinnaavoq, kisiannili illit piginneqataasutut inissiamik aalajangersimasumik ataasiinnarmik atuisinnaatitaavutit.

Piginneqataasutut inissiami najukkanni najugaqarnissamut pisussaaffeqarputit. Najugaqartussaatitaanerup kingunerisaanik illit imaluunniit inoqutigisavit akornanni inuk alla ukiup ataatsip ingerlanerani sivikinnerpaamik qaammatini arfinilinni unnuisartussaavusi.

Piginneqataasutut piginneqatigiilluni inissiaatillit peqatigiiffiata pigisaanut piginneqataavutit. Piginneqatigiilluni inissiaatillit peqatigiiffiata pigisaanit piginneqataassutitit, inissiap najukkavit annertussusiata piginneqatigiilluni inissiaatillit peqatigiiffiani inissiat tamarmiusut annertussusaannut naleqqiullugu naatsorsugaapput.

Assersuut:

  • Piginneqatigiilluni inissiaatillit peqatigiiffiata inissiaataasa tamarmiusut annertussusiat: 1044
  • Inissiap najukkavit annertussusia: 87
  • Piginneqatigiilluni inissiaatillit peqatigiiffiata pigisaanit piginneqataassutitit: 1/12


Piginneqatigiilluni inissiaatillit peqatigiiffianni ataatsimeersuarneq oqartussaasuni qullersaavoq. Ataatsimeersuarnermi piginneqataasut tamarmik ataatsimik taasisinnaatitaapput. Ataatsimeersuarnermi siulersuisut taakkununngalu siulittaasoq aningaaserisorlu ilanngullugit qinerneqartarput, taakkulu peqatigiiffiup ulluinnarni ingerlanneqarneranik isumaginnittussaapput.


Aserfallatsaaliuineq
Piginneqataasutut piginneqatigiilluni inissiaatip najukkavit iluata aserfallatsaaliornissaa pisussaaffigaat. Tassani pineqartut tassaasinnaapput:

  • Qalipaaneq, qaqorsaaneq aammalu iikkanik tapet-ilersuineq
  • Naternik, matunik ilorlernik listinillu taarsersuineq
  • Igaffimmi nerriviusanik, sikaavinnik ikkutanik imaluunniit uffarfimmik aserfallatsaaliuineq taarsersuinerlu


Piginneqatigiilluni inissiaatillit peqatigiiffiata piginneqatigiilluni inissiamut tunngatillugu aserfallatsaaliugassat allat, kiisalu silami aserfallatsaaliugassat aammalu nunaminertani ataatsimoorussani aserfallatsaaliugassat akisussaaffigai.

Piginneqataasutut piginneqatigiilluni inissiap najukkavit iluani annikitsunik allannguinissaq, soorlu matunik igaffimmilu atortunik ikkussuineq piiaanerluunniit pisinnaatitaaffigaat. Inissiap iluani annertunerusunik allanngortitsissaguit siulersuisut akuersiteqqaassavatit.


Malugiuk
Inuinnaat aammalu namminersorsinnaatitaasut kisimik piginneqatigiilluni inissiaatillit peqatigiiffiannut ilaasortaasinnaapput.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl