Illuatungeriinnik tusarniaasarneq

Nalinginnaasumik paasissutissiineq 

Kalaallit Nunaanni suliffissaqartitsiniarneq pisortanit aamma namminersortunit ingerlatsivigineqarpoq. Namminersortuni aamma pisortani sulinermi atugassarititaasut inatsisit naapertorlugit maleruagassiorneqarput. Pisortani atorfillit atorfeqarnermi atugaat matumani aamma isumaqatigiissut, atorfillit ataasiakkaat malitaat, malillugit maleruagassiorneqarput. Kinguliini allassimasut pisortani atorfilinnuinnaq atuupput.

Ilaanni suliffinni suliffivilluunniit avataani pisoqartarpoq atorfeqarninnut kingunerlutsitsisinnaasunik. Assersuutigalugu:
• Sulisitsisunnut nalunaaqqaarnak suliartunngitsuukulasaruit
• Suliffimmi malittarisassat unioqqutikkukkit, assersuutigalugu imigassaq aalakoornartulik pillugu
• Sivisuumik napparsimaguit imaluunniit napparsimakulasaruit
• Suleqatit isumaqatigilersinnaanngikkukku

Taamatut pisoqartillugu susoqarsimanersoq aamma sooq taama pisoqarsimanersoq pillugit isummavit tusarnissaa sulisitsuit tusassallugu pisariaqartissinnaavaa. Tamanna illuatungeriinnik tusarniaanermik taaneqartarpoq.

Illuatungeriinnik tusarniaanermi siunertaavoq, suliamut tunngassutilinnik tamanik qulaajaanissaq, taamaalilluni sulisitsisoq naliliinissamut tunngavissaqalissaaq tusarniaanerlu tunngavigalugu aalajangiisinnaanngorluni.

Sulisitsisut aallaaviatigut ilinnut tusarniaaqqaarnani illit atorfeqarninnut kingunerlutsitsisinnaasumik aalajangiussaqarsinnaanngilaq.

Ingerlatseriaaseq 

Illuatungeriinnik tusarniaanerup qanoq ingerlannissaanut aalajangersimasumik periuseqartoqanngilaq. Nalinginnaasumik aqutsisuit allagaqarneratigut pisarpoq, aammali naapilluni ataatsimiinnikkut imaluunniit marluutillugit pisinnaalluni.

Suliamut tunngatillugu tusarniaaffigineqassaguit ataatsimiigiaqquneqassaatit. Ataatsimiinnermi illersuisussannik ilaqarsinnaatitaavutit. Illersuisussamik ilaqarneq pitsaasuusarpoq, pissutigalugu suut oqaatigineqarnersut amerlanerusunit tusaaneqassammata. Illersuisussaq tassaasinnaavoq:
• Sulisutut sinniisut
• Inuk alla illit nammineq toqqakkat

Ataatsimiigiarnissannut pisussaavutit ataatsimiinnermilu peqataallutit.

Ataatsimiinnermi illuatungeriit tusarniaaffigineqarnerinut tunngatillugu allagaq tunniunneqassaaq. Suliap sumut tunngassuteqarneranut aamma sooq tusarniaasoqarnersoq pillugit taanna nassuiaataavoq.

Tamatuma kingorna piffissaqartinneqassaatit suliamut tunngatillugu nassuiaassuteqarnissannut. Tamanna oqaasiinnartigut allakkatigullu sulisitsisunnut tunniussinnaavat.

Sulisartuuguit kattuffinnit siunnersorneqarnissat periarfissarigit iluaqutaavoq.

Aalajangiineq 

Piffissatut killiliussaq nallerpat, paasissutissat saqqummiunneqartut tunngavigalugit sulisitsisut naliliissaaq. Piffissatut killiliussaq malinngikkukku, suliamut tunngatillugu oqaaseqaatigisatit sulisitsisup naliliinermini ilanngutissallugit pisussaaffiginngilaa.

Sulisitsisut suliamut tunngatillugu aalajangeereerpat, aalajangiussaa allaganngorlugu pissarsiarissavat.

Aalajangiinerit suusinnaaneri 

Illuatungeriinnik tusarniaanermi sulisitsisut aalajangiineri assigiinngitsorpassuusinnaapput. Assersuutigalugu imaassinnaavoq:
• Mianersoqquneqartutit
• Soraarsitaasutit
• Peersitaasutit
• Suliami annerusumik iliuuseqartoqanngitsoq

Mianersoqqusineq
Mianersoqquneqaruit annerusumik susoqassanngilaq. Pisorli mianersoqqusinermik kinguneqartoq uteqqikkukku, atorfeqarninnut pitsaanngitsunik kinguneqarsinnaavoq.

Soraarsitsineq
Soraarsitaaguit illit nammineq assersuutigalugu funktionærinut inatsimmi imaluunniit isumaqatigiissutinni soraarsitaanissamut ilimasaarineq naapertorlugu atorfeqarunnaarnissat pissaaq. Soraarsitaanissamut ilimasaarinerup sivisussusaa apeqqutaavoq:
• Qanoq sivisutigisumik atorfimmi sulisimanersutit
• Isumaqatigiissutit

Nalinginnaasumik soraarsitaanissamut ilimasaarineq qaammatinik pingasuniit arfinillit tikillugit sioqqutsilluni sivisussuseqartarpoq, taamaattoq sivikinnerusinnaallunilu sivisunerusinnaavoq.

Peersitaaneq
Peersitaaguit, aalajangiinermiit atorfeqarnerit ernerluni atorunnaarsinneqassaaq.

Naammagittaalliuuteqarneq 

Sulisitsisuit aalajangiineranut isumaqataanngikkuit, kattuffiit attavigisinnaavat. Kattuffivit taperserunitit, suliaq sulisitsisut peqatigalugu qaqileqqissavat.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl