Pisortani atorfeqartunit toqukkut qimagaasut – Pisinnaatitaaffiit

Pisortani atorfeqartunit toqukkut qimagaasut – Pisinnaatitaaffiit 

Katissimasaq imaluunniit inooqatigisaq toqukkut qimagukkaangat, maqaasineq annertooq kiserngoruttarpoq. Matuma saniatigut isummerfissanut atatillugu apeqqutit nalinginnaasorpassuit isummerfigineqartussaapput, assersuutigalugu:
  • Inuuniarnermi aningaasanik ikinnerusunik atugassaqalissaanga?
  • Katissimasara sumi ilineqassava?
  • Inissiarisatsinni najugaqaannarsinnaassanerlunga aamma akissaqartissanerpara?
  • Allamut nuussaanga?
  • Tamakku tamaasa kia akilissavai?

Katissimasat imaluunniit inooqatigisat pisortani atorfeqarnermi nalaani toqukkut qimaguppat, qimagaasutut makkuninnga pisinnaatitaavutit:
  • Soraarnerussutisiat (efterløn)
  • Illerfiup angallanneqaratarsinnaanera
  • Pequtit angallanneqaratarsinnaanerat
  • Atorfimmut atatillugu soraarnermi akiliunneqarluni angalaneq

Qimagaasut tamarmik assigiinnik pisinnaatitaaffeqarneq ajorput. Illit pisinnaatitaaffitit, katissimasavit imaluunniit inooqatigisavit toqukkut qimaguttup atorfeqarnermi isumaqatigiissutaanit aalajangersarneqarsimasarput.


Soraarnerussutisiat (Efterløn)
Katissimasat toqukkut qimaguppat, isertittakkatit ikilissapput. Aningaasatigut annaasat nalimmassarumallugit, illit katissimasavit akissarsiassaasa, taassuma toqukkut qimagunnerata kingorna qaammatit pingasut tikillugit sivisussusilimmik tigusarnissaannut pisinnaatitaaffeqarputit. Taakku taaneqartarput soraarnerussutisiat (efterløn).


Illerfimmik angallassineq
Katissimasat imaluunniit aapparisat toqukkut qimaguppat, toqukkut qimaguttup atorfininnermini aallaavianut illoqarfimmut nunaqarfimmulluunniit Kalaallit Nunaanniittumut Danmark-imiittumulluunniit, angallanneqarnera pisortat suliffeqarfiutaata akilersinnaavaa. Illerfik aallaavittut isigalugu umiarsuarmik angallanneqartussaavoq. Tamanna pisinnaanngippat illerfik timmisartukkut angalanneqassaaq.


Najugaq
Katissimasavit imaluunniit aapparisavit toqukkut qimaguttup suliffimmut atasumik inissiarisaani najugaqaruit, suliffimmut atasumik inissiami qaammatip sinnera qaammatip tullianik ilallugu najugaqaannarnissannut pisinnaatitaavutit.


Pequtinik angallassineq
Suliffimmut atasumik inissiamit allamut nuuttussanngoruit, pequtivit nuunneqarnerannut akiliunneqarnissamut pisinnaatitaavutit. Taamaattoqassappat katissimasavit imaluunniit aapparisavit toqukkut qimaguttup suliffeqarfigisimasaata tamanna akilissavaa.

Pequtit qanoq amerlatigisut nuunneqarnissaannut akiliunneqarsinnaaninnut aallaaviussaaq
  • suliffimmut atasumik inissiaq pequteqareersimanersoq – tassa taakku illit imaluunniit inissiaatileqatigiiffiup pequtaatiginerai
  • aamma qassinik angerlarsimasunik meeraqarnersutit

Soraarnermut atatillugu akiliunneqarluni angalaneq
Katissimasavit imaluunniit aapparisavit toqukkut qimagunnerata kingorna allamut nuussaguit, soraarnermut atatillugu akiliunneqarluni angalanissamut pisinnaatitaavutit, toqukkut qimaguttup suliffeqarfigisimasaata akilertussaasaanik.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl