Qaammammusialinnut soraarnerussutisiat

Nalinginnaasumik paasissutissiineq 

Kalaallit Nunaanni suliffissaqartitsiniarneq pisortanit aamma namminersortunit ingerlatsivigineqarpoq. Namminersortuni aamma pisortani sulinermi atugassarititaasut inatsisit naapertorlugit maleruagassiorneqarput. Pisortani atorfillit atorfeqarnermi atugaat matumani aamma isumaqatigiissut, atorfillit ataasiakkaat malitaat, malillugit maleruagassiorneqarput. Kinguliini allassimasut pisortani atorfilinnuinnaq atuupput.

Innuttaasut tamarmik 65-inik ukioqaleraangamik utoqqalinersiuteqalernissamut pisinnaatitaapput. Pisortani atorfeqaruit taakku saniatigut sulinerit aqqutigalugu soraarnerussutisiassannik isertitaqartarputit.

Qaammammusisaruit nalinginnaasumik soraarnerussutisiaqalernissamut aaqqiissummut ilaassaatit, tassanilu sulisitsisut kisimi qaammatikkaartumik soraarnerussutisiassanik katersuiffimmut akiliisarluni, imaluunniit illit sulisitsisullu qaammatikkaartumik soraarnerussutisiassanik katersuiffimmut akiliisassallusi.

Tunniussineq 

60-inik ukioqaleruit soraarnerussutisiaqalernissamut pisinnaatitaavutit illillu soraarnerussutisiassanik katersuiffinnit soraarnerussutisianik tunineqarsinnaalissallutit. Aamma soraarnerussutisiaqalernissat kinguartissinnaavat, assersuutigalugu 65-inik ukioqalernissavit tungaanut. Soraarnerussutisiaqalernissavit kinguartittarnera sivitsoraluttuinnartillugu, soraarnerussutisiassatit amerligaluttuinnassapput.

Soraarnerussutisiavit amerlassusissaasa aallaavigissavaa ilaatigut:
• Soraarnerussutisiassannut katersuiffinnut illit sulisitsisullu qanoq amerlatigisunik ikisisimanersi
• Illit soraarnerussutisiaqalereernerpit kingorna qanoq sivisutigisumik inuunissat naatsorsuutigineqarnersoq (soraarnerussutisiassannut katersuiffinnit naatsorsorneqartoq aamma kisitsisinik atuilluni naatsorsuinermik taaneqartartoq)

Sulisartut kattuffiannut ilaasortaaguit, taanna siusinaartumik sulisinnaajunnaarnersiuteqarlernissat imaluunniit utoqqalinersiuteqalernissat sioqqullugu attaveqarfigisariaqarpat matumalu kingorna soraarnerussutisiassannut katersuiffigisat attaveqarfigalugu.

Sulisartut kattuffiannut ilaasortaanngikkuit, nammineerlutit soraarnerussutisiassannut katersuiffigisannut saaffiginnissaatit.

Siusinaartumik sulisinnaajunnaarnersiutisiat 

Siusinaartumik sulisinnaajunnaarnersiutisiaqalersimaguit, assersuutigalugu peqqissutsikkut pissuteqartumik sulisinnaajunnaartariaqarlutit, soraarnerussutisiassannut katersuiffigisannit soraarnerussutisiassatit tigusinnaavatit – aamma suli 60-inik ukioqalinngikkaluarlutit.

Siusinaartumik sulisinnaajunnaarnersiutisialinnut soraarnerussutisiassanik tunniussinermut maleruagassat immikkuullarissut, soraarnerussutisiassanik katersuiffiit malittarisassaannik ataasiakkaani atuarneqarsinnaapput.

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl