Innuttaasunut ataatsimiisitsineq: Najugaqarfigisagut qanoq nassuiarneqassappat?

Najugaqarfigisatta tamarmiusut ataatsimoortumik qanoq nassuiaatissaata imaqarnissaanut siunnersuuteqarit.
Dato:
19. januar 2016
Tid:
19:00
Sumi:
Piareersarfik Sillit
Akia:
0,-
Aaqqissuisoq:
Namminersorlutik Oqartussat

Najugaqarfigut pillugit Inatsisartut 2016-imi ukiaanerani oqallisissapput. Maannalu periarfissaqalerputit oqallinneq ilaatigut qanoq imaqarsinnaaneranik. 

Nuna tamakkerlugu pilersaarusiortarnermut immikkoortortaqarfiup najugaqarfinni arlalinni innuttaasunit isummanik pissarsiniarlutik qaammatini januaarimi februaarimilu innuttaasunut ataatsimiisitsissapput. 

Ilulissani Piareersarfik Sillimi marlunngornermi januaarip 19.-nni nal. 19:00-miit 21:00-mut innuttaasunut ataatsimiisitsisoqassaaq.

Innuttaasunut ataatsimiisitsinermi pilersaarut:

- Borgmesterimit Naalakkersuisumiillu naatsumik aallarniisoqassaaq.

- Inatsisartut novembarimi 2015-mi suna oqallisigisimaneraat naatsumik saqqummiineq.

- Najugaqarfigut tamarmiusut pillugit ataatsimoortumik nassuiaaneq pillugu naatsumik saqqummiineq.

- Najugaqarfitta qanoq nassuiarneqarnissaanut qanoq isumaqarfigineqarneranut nerrivinni ataatsimut isummersoqatigiinneq.

- Siunnersuutinik saqqummiineq.

Kaffi, tii kaageeqqallu sassaalliutigineqassapput.

Innuttaasunik ataatsimiisitsinermi peqataasut tamarmik kinaassutsimik isertuussillutik isummersinnaanissaanut periarfissinneqassapput. Isummersuutillu atortorissaarummi tamanut takuneqarsinnaassapput. 

Innuttaasunillu ataatsimiisitsinermi kissaataavoq najugaqarfigisatta tamarmiusut ataatsimoortumik qanoq nassuiarneqarsinnaaneranut isummanik tusarnissaq. Kommunini nunatsinnilu politikerit allaffeqarfinnilu aalajangiisoqassatillugu nassuiaatit sakkussatut atorneqartassapput. 

Tamat oqartussaaqataanerat tunngavigalugu suliamut peqataagit, siunissami najugaqarfigut ataatsimoorluta qanoq nassuiarneqarsinnaanersut aammalu qanoq nalilersorneqarsinnaanersut tassani oqallisigineqassammat, tamassuma kingunerissavaa politikkikkut allaffissornikkullu aalajangiisoqalersarnerani tunngavigisassanut nassuiaatit ersarissut ilanngunneqartarsinnaalerneri. 

Paasisaqarnerorusukkuit suliamut aqutsisoq Klaus Georg Hansen kgha@nanoq.gl attavigiuk.